Tur operador di grua na Aruba mester ta certifica

Inspector Haime Vingal ta splica:

ORANJESTAD (AAN) – Señor Haime Vingal a comenta, den entrevista cu DIARIO, cu operadornan di grua mester ta certifica, y aki na Aruba tin companianan cu ta duna les y training na e trahadornan aki.

E parti di DTI ta cu ora e inspector di seguridad bay controla, nan ta puntra e operator pa su carnet. Si e no tine, of e carnet no ta valido tin autorizacion di para e trabao te ora nan pasa e caso pa señor Vingal mes. Su colega Francis a yega di para un trabao pasobra e operador di grua no tabata certifica.

Vingal a splica cu na Aruba tin diferente categoria di grua. Tin esun movil cu ta esun di mas chikito di 15 ton, y esun di mas grandi cu ta di 230 ton. Siguiente ta esun overheat cu mayoria por haya nan den shop of storehouse; esnan cu ta core ariba y cu normalmente ta di 5 ton bay ariba. Y tambe tin e asina yama “toren kraan” cu por mira den diferente construccion, manera den dos proyecto cu tin un panoord y otro pazuid. Y pa ultimo, tin esun yama Crawler, cu na Aruba tin un so.

Esaki ta e tiponan di grua cu tin actualmente na Aruba, y tur ta pasa door di e proceso di keuring anual. El a remarca cu si e grua no ta carga e sticker di DTI cu e ta gekeuring e no por opera.

Finalmente, Inspector Haime Vingal ta pidi tur doño di ekipo di grua ta pa keur nan ekipo na tempo, y un conseho pa tur persona cu ta huur un ekipo, pa puntra si e ta gekeurd of no.