Maestro y musico Johnny Croes cu suplica
ORANJESTAD (AAN): Maestro y musico Johnny Croes, graduado cum laude di Berklee College of Music y cu a traha durante 22 aña na Scol di Musica Rufo Wever, ta haci un apelacion pa un debate mas amplio riba e futuro di educacion di musica na Aruba.
Den su analisis, “Musica Ta Parti di un Bon Educacion: Un apelacion pa mas calidad, continuidad y vision den educacion di musica na Aruba,” Croes ta haci e pregunta fundamental: con nos por duna nos muchanan e calidad, structura y continuidad cu nan merece den educacion di musica?
Pa Croes, musica ta mas cu notanan, ritmo y melodia. Musica ta desaroya disciplina, creatividad, concentracion, memoria, confianza, perseverancia y e abilidad pa scucha y traha hunto cu otro.
“Tur mucha di Aruba merece e oportunidad pa haya un educacion di musica di calidad,” ta e punto central di su analisis.
Nos tin un fundeshi: Croes ta señala cu Aruba no mester cuminsa for di cero. Nos tin un historia musical y educativo rico. Generacionnan di muchanan a crece cu musica na scol, y e canticanan di Nos ta Canta a conecta musica cu nos idioma Papiamento, nos cultura y nos identidad. Nos tin tambe maestronan, musiconan, institucionnan y organizacionnan cu durante añanan a contribui na e desaroyo di talento na Aruba.
Pero Croes ta considera cu nos mester mira mas leu cu pasado y puntra nos mes: “Kico nos kier pa educacion di musica bira dentro di 10, 20 of 30 aña?” Aruba ya tin un framework nacional pa Kunstzinnige Vorming. E Kerndoelendocument pa Enseñansa Primario di 2017 ta inclui Kunstzinnige Vorming como un di e areanan di formacion den enseñansa primario.
Sin embargo, e Onderwijsplan Kunst- en Cultuureducatie di juli 2024 ta reconoce cu e framework aki mester wordo actualisa. E documento ta señala tambe cu e parti di Kunstzinnige Vorming pa enseñansa primario no ta actual, cu no tur scol ta implementa esaki y cu mester desaroya un leerlijn-document nobo.
Pa Croes, esaki ta mustra cu e necesidad pa fortalece educacion di musica no ta solamente un opinion personal. Tin caba un reconocemento den e maneho educativo cu tin trabao pa haci.
Acceso cu calidad: Croes ta enfatisa cu e debate no mester ta acceso versus calidad. “Tur mucha mester tin acceso na musica, pero tur mucha tambe merece un bon educacion di musica,” e ta argumenta. E dos cosnan aki por bay hunto: E calidad ta cuminsa, entre otro, cu e formacion di e maestro.
IPA (Instituto Pedagogico Arubano) ta inclui Kunstzinnige Vorming den e formacion di maestro pa enseñansa primario, cu ta inclui musica, beeldende vorming, drama y dansante vorming.
Croes ta haci un distincion entre e maestro di klas y e maestro specialisa den musica. Un maestro di klas mester tin conocemento den hopi diferente area, mientras cu un vakdocente di musica por desaroya un conocemento mas profundo di ritmo, melodia, lectura musical, instrumento, repertorio, tecnica, interpretacion y didactica.
‘Nos no mester scohe entre un y e otro. Nos mester tur dos’. Segun Croes, e maestro di klas por incorpora musica den e rutina diario di scol, mientras cu un maestro specialisa por duna un curiculo di musica mas structura gradual y progresivo.
IPA tambe tin e rol den investigacion educativo. Croes ta menciona un proyecto di investigacion practico presenta na IPA na 2026, titula “De invloed van muziek in de onderbouwgroepen,” cu ta trata e influencia di musica den e klasnan mas jong.
Cooperacion ta esencial: Aruba ta un isla chikito, cu recursonan limita pero cu hopi talento y experiencia. Croes ta considera cu esaki ta un motibo pa fortalece e colaboracion entre scolnan, gobierno, institucionnan y e sector di arte y cultura.
Un di e retonan cu e Onderwijsplan Kunst- en Cultuureducatie di 2024 ta identifica ta e falta di cooperacion y coordinacion entre scolnan y aanbieders di arte y cultura, y ta propone un colaboracion mas duradero entre scolnan y sectornan cultural.
Musica, Papiamento y identidad: Pa Croes, educacion di musica tin tambe un dimension cultural. Departamento di Enseñansa ta reconoce e importancia di Papiamento den Kunst- en Cultuureducatie y e relacion entre idioma, arte y cultura. E historia di Nos ta Canta ta un ehempel con musica por conecta educacion, idioma y identidad.
Ora nos muchanan ta canta na Papiamento, nan no ta solamente siña un cantica. Nan ta siña idioma, cultura y historia. Musica por forma un brug entre educacion, idioma y identidad.
Un punto di salida pa futuro: Croes ta reconoce cu Gobierno no mester haci tur cos, pero no ta kita afo cu e tin un rol importante pa establece e framework, establece normanan di calidad, facilita formacion di maestronan, pone recursonan disponibel y sigura cu e metanan educativo ta wordo implementa.
E Onderwijsplan Kunst- en Cultuureducatie di 2024 ta propone, entre otro: (*) Revisa e Kerndoelendocument; (*) Desaroya un leerlijn pa Kunst- en Cultuureducatie; (*) Fortalece formacion y bijscholing di maestronan; (*) Considera vakdocenten of profesionalnan certifica den arte na scolnan; (*) Mehora materialnan y facilidadnan; (*) Fortalece colaboracion entre scol y e sector di arte y cultura.
Croes ta mira esakinan como un punto di salida importante.
“Nos no mester inventa tur cos di nobo. Nos tin un fundeshi. Nos tin un historia. Nos tin talento. Nos tin maestronan. Nos tin experiencia. Awor nos mester trece esakinan hunto.”
E analisis no ta presenta un solucion unico pa tur e retonan di educacion musical. Croes ta enfatisa cu su intencion ta pa habri un debate constructivo y puntra si Aruba por haci mas pa sigura cu e muchanan ta haya e educacion di musica cu nan merece.
Un vision cu nos por comparti: Talbes tin diferente opinionnan riba con educacion di musica mester wordo organiza. Pero Croes ta kere cu tin un principio fundamental cu por uni nos: Tur mucha di Aruba merece e oportunidad pa haya un educacion di musica di calidad.
Pa logra esaki, nos mester tin metanan cla, maestronan bon prepara, vakdocenten caminda ta necesario, materialnan y facilidadnan adecua, continuidad, evaluacion, investigacion y colaboracion. No pa un organizacion. No pa un persona. No pa un gobierno. Sino pa nos muchanan.
“Mientras Aruba ta amplia e acceso na educacion di musica, laga nos tambe pone calidad como e meta central,” Croes ta conclui. Pasobra musica no ta solamente algo cu nos por ofrece na nos muchanan. Musica ta parti di un bon educacion.
Tocante e Autor: Johnny Croes ta un graduado cum laude di Berklee College of Music. El a traha durante 22 aña na Scol di Musica Rufo Wever como maestro y director suplente, caminda el a contribui na e desaroyo di e curiculo. E ta autor di cinco buki di piano cu obra di compositornan Arubiano. E tabata miembro di directiva, co-fundador y organizado di Aruba Symphony Festival, y ta iniciado di Leerorkest Aruba. Awe e ta fundador y director di Allegro Piano Studio.
