Pa mas transpariencia
ORANJESTAD (AAN): E siman aki despues cu e organizacion di Comerciantenan Uni di Aruba a lanza criticanan hopi fuerte riba instancianan di Gobierno, specificamente DOW cu e tardanza di procesa mapa pa duna permiso di construccion, y tambe e careteranan di Aruba cu ta hopi deteriora, awor a bin haya reaccion di Ministro Rene Herdé encarga cu Departamento di Obranan Publico.
Ministro Herdé a bisa cu su pensamento riba esaki ta cu nan Ministerio tin di bay comunica mas y miho. Esaki den sentido cu el a ocupa e puesto pa un periodo cortico, y loke bin riba mesa lo wordo atendi.
Segun Ministro, nan lo bay yama Comerciantenan Uni di Aruba (CUA), y Diaranson el a topa cu esnan di Camara di Comercio. E ta bay topa cu otro organizacionnan, y tin reunion pendiente cu AHATA cu a tarda un poco incluso un tiki di e banda di Ministerio.
“Nos ta bay reuni cu tur hende. Tur hende, sindicato, organisacion comercial, organisacion social, tur hende. Nos no por por goberna cu porta cera. Nos tin di tende critica pa nos por gara e critica y haci algo cu ne,” Ministro a declara.
Ministro a subraya cu den su programa di “Info di Infra”, e ta pidi hende pa mand’e preguntanan. “Manda bo preocupacionnan pa nos scuch’e, pa nos dunabo informacion, y uza informacion ey pa drecha loke tin.
“E departamentonan sa masha bon, cu mi ta proteha, defendenan, stimulanan, y haci tur cos pa nan mehora. Nan tin cu mehora. Pero e critica ey nos ta bai tuma tur na serio,” Ministro Herdé a indica.
El a bisa cu ta haya hopi fastioso ora cu e ta topa hende na Misa, y nan ta bin bis’e cu nan 14 aña of 12 aña wardando pa un pida tereno.
Ministro a finaliza bisando: “Bo kiermeen awe na Aruba un hende mester warda 14 of 12 aña pa un tereno, no tin mag, toch? Si e tereno caba, ta otro cos. Pero simplemente nan no ta haya ni contesta. Den e caminda ey e hende ta keda disgusta, pasobra pa colmo nan no a ni ricibi un contesta. Esey ta algo cu mi ta duna nan tur razon, tur razon!”
