Tur locual SNBA haci ta bay ta cu envolvimento di comunidad

ORANJESTAD (AAN): Recientemente Errol de Freitas a wordo eligi presidente nobo di San Nicolas Business Association (SNBA) y

durante un encuentro prensa a puntra de Freitas kico su vision ta awor cu e ta presidente di SNBA.

El a splica cu e vision ta un documento bibo.

“E ta un organizacion di 50 y pico aña y apesar cu e circunstancianan rond di e distrito lo cambia, e vision ta intacto pa e progreso di e aspecto comercial di pariba di brug, no solamente pa San Nicolas, pasobra nos ta vigila di Balashi te cu Punta Basora”.

Durante e pandemia nos a tuma tambe e reto social pa ta envolvi cu e comunidad, segun de Freitas.

El a sigui bisa cu San Nicolas ta e ultimo frontera cu tin cu desaroya y awor nos tin cu ta conciente con nos ta bay desaroye, pa sigura cu comunidad ta bay ta envolvi y tambe cu nan ta esunnan tambe cu ta bay disfruta di e desaroyo aki.

“Actualmente nos ta bezig cu e parti di formacion di e directiva cu ta bay sosode den e dianan cu ta bin y despues nos lo tuma contacto bek cu prensa pa duna un relato mas amplio cu e puntonan mas cardinal cu nos ta bay para pe, pa mi termino pa e dos proximo añanan, segun e presidente nobo di SNBA.

Prensa a puntra de Freitas tambe con a para cu e puntonan riba agenda di SNBA prome cu el a bira presidente.

El a splica cu SNBA algun tempo atras a bay Gobierno cu un manifiesto cu 20 punto y cu un di e puntonan cu a wordo logra caba ta cu IMSAN ya caba ta un instituto independiente.

“Esaki ta nifica cu no lo tin un fusion cu Hospital, sino un cooperacion entre Hospital y IMSAN”.

E ta un logro grandi pa nos di pariba di brug cu ta 40% di e poblacion di Aruba, segun de Freitas.

El a sigui bisa cu SNBA ta tene varios reunion cu Gobierno, incluyendo cu ministernan independiente y cu nan ta bezig cu e proyecto di Seroe Colorado, como tambe cu desaroyonan importante den Caya Principal cu mester keda cla.

“Nos ta bezig entre otro tambe pa duna sosten na locual ta wordo yama e ‘Zona Roja’ y tambe e Aruba Art Fair, segun e presidente di SNBA, kende a sigui bisa tambe cu mester percura entre otro pa e beachnan pariba ta limpi.

El a splica tur cos cu ta wordo haci, no por sin envolvimento di comunidad.