ORANJESTAD (AAN): KIVI Kring Caribbean ta organisa su di tres actividad di e aña aki cu ta un bishita na e planta di procesa desperdicio di Ecotech Free Zone Balashi Aruba.
E desperdicio cu ta wordo colecta na cas ta yega cu truck na e planta di Ecotech Free Zone y despues e cantidad ta wordo midi. Siguientemente e desperdicio ta bai ariba un vloer unda e por wordo separa: e tirenan ta bay den container di tire pa sigui wordo procesa un otro caminda y e resto di desperdicio ta bay apart via un hopper den un shredder pa hacie chikito.
Carton, papel, metal, aluminium y desperdicio kimico chikito ta wordo separa cu man y deposita den contenedornan apart. Asina cu e contenedornan ta yen nan ta bai pa e recycladornan local cu ta exporta esakinan cu excepcion di e desperdicio kimico cu ta bai e deposito di Serlimar unda e ta wordo deposita segun nan instruccion. Carton y papel los ta wordo warda apart pa despues tambe wordo procesa den e planta cu ta paketa e desperdicio.
Despues di proceso di separacion cu man aki e resto ta bai e hopper y e shredder pa wordo haci mas chikito ainda den diferente fragmento cu ta menos cu 80 mm, uno cu ta entre 80 mm y 240 mm y uno cu ta mas grandi cu 240 mm. E ora ey den e procesa e residuo cu ta combustibel (“Refused Derived Fuel or RDF”) ta wordo separa for di e resto di karton, metal y aluminium. E ultimonan aki automaticamente ta wordo poni den bunkernan separa. E RDF ta un fragmento di desperdicio combustibel no toxico cu por wordo uza den fornonan industrial, por ehempel pa traha cement.
E RDF aki ta wordo paketa den paketenan grandi, e asina yama “envirobales”. E planta ta procesa 49 ton pa ora locual ta equivalente na 32 pa 35 “envirobales” cu cada uno un peso promedio di mas o menos 1.5 metric ton (1 MT = 1,000 kg). E “envirobales” ta wordo deponi na un luga designa pa Gobierno di Aruba cu applicacion di e normanan di medio ambiento stipula pa Comunidad Europeo. E resto di karton, metal y aluminium cu ta recycable tambe ta wordo paketa den paketanan cu ta wordo exporta. Mensualmente muestranan di e RDF ta wordo tuma door di inspectornan independiente y manda pa un laboratorium na USA pa control di e calidad. Esaki ta pa controla si e calidad ta cuadra cu e calidad stipula pa autoridadnan.
Durante e bishita na Ecotech Freezone lo tin un presentacion di Sr. Eduardo de Veer cu a studia na Universidad di Miami USA y a gradua den Business Administration cu especialidad financiero. Sr. De Veer tabata un di e directornan di Meta Corporation cu ta un di dunadonan di trabao di mas grandi na Aruba. Entre otro sr. De Veer ta consul honorario di Dinamarca na Aruba y ta condecora como Officier in de Orde van Oranje Nassau y Ridder in de Orde Primera Clase Danneborg di Dinamarca. Sr. De Veer ta pasiona cu e topico di maneho di desperdicio na Aruba y tin hopi idea innovativo.
KIVI Kring Caribbean ta invita e ingenieronan pa bin haci un bishita na Ecotech Freezone pa asina haya sa mas kico ta e posibilidadnan pa maneha desperdicionan cu ta posibel aki na Aruba y pa haya sa mas di ideanan innovativo tocante esaki. E actividad lo tuma luga dia 2 di juni 2022 den Aula na Ecotech Freezone, Barcadera, di 10:00 am te cu 12:00 pm.
