MIAMI: Un Federal District Judge na Miami a condena tres habitante di South Florida cu 220 luna castigo di prison.
Esaki despues cu hurado a haya nan culpable di a planea y ehecuta un plan amplio pa comete fraude, unda fabricantenan Mericano di e.o. Lechi pa Baby a wordo estafa pa mas di 100 miyon Dollars.
Segun Justice Department, ta trata aki di e pareha Surinameño Raoul Doekhie di 53 aña, y Sherida Nabi di 57 aña, y e homber johnny Grobman di 48 aña.
Raul y Sherida tabata bisa e fabricantenan cu nan ta cumpra e productonan aki pa asina manda nan pa Suriname, hopi biaha cu un supuesto ‘contract di gobierno’ cu nan tin na Suriname. Debi na esey, nan tabata haya descuento enorme riba prijs di producto.
A bin sali na cla cu e acusadonan no tin ningun contract cu Gobierno, y nunca tabatin plan pa exporta e productonan pa Suriname. Envez di esey, Johnny Grobman y otronan tabata bende e productonan aki na Merca mes pa miyones di Dollar, cual placa nan tabata reparti entre nan mes.
Ademas di lechi pa baby, a haci deal tambe cu productonan pa cuido di wowo, y otro articulo cu ta reglamenta bao di supervision di FDA di Merca. E acusadonan tabata sconde nan actividadnan na diferente forma di e fabricantenan Mericano. Entre otro door di manda ‘cargamento ficticio’ pa exterior, generando documentacion pa demostra cu un exportacion a tuma lugar.
Un otro metodo tabata pa re-envia e productonan. Pues nan ta manda e productonan pa exterior, generando documento di exportacion. Asina cu e carga yega den exterior, nan ta wordo manda bek pa Merca. E di tercer metodo tabata pa crea documentonan fraudulento di exportacion, unda ta mustra cu e productonan a wordo exporta, siendo cu nunca nan a bandona e pais.
Nan a haci esaki for di 2013 te cu 2018, y durante e periodo aki nan a gana miyones di Dollars haciendo e estafa.
E potret aki por mira tres bleki di Lechi pa Baby cu Justice Department a presenta como prueba, cu nan tabata usa pa estafa e companianan.
