Segun Yvette Geerman di DVG:
ORANJESTAD (AAN): Durante temporada di Carnaval specialmente durante e paradanan, hopi hende ta probecha pa bende cuminda prome, durante y despues di paradanan. Hefe di Dienst Warenkeuring en Hygiene di DVG, Yvette Geerman a duna di conoce cu DVG a haci control durante henter temporada di Carnaval y lo sigui haci control riba full e ruta di e ultimo paradanan di Carnaval. E control aki ta riba tur esnan cu ta bende cuminda, incluso kiosko y esnan cu ta bende cuminda riba garoshinan como tambe esnan cu ta bende pizza. Tur regla ta conta mescos pa tur.
El a enfatisa cu tur hende cu ta bende cuminda, hasta pastechi entre otro, sea cu permiso of no, mester cumpli cu e reglanan stipula. Entre otro nan mester tin den nan posicion e carchi di salud valido cu ta regula den ley. El a agrega cu pa tur esnan cu ta bende cuminda, mester tin siguransa cu nan no ta carga cierto bacteria.
Tambe nan mester cumpli cu reglanan di higiena di cuminda, cu ta encera e calidad di cuminda, con nan ta presenta e temperatura tanto di e cuminda como di e bebida. Percura pa tin suficiente ijs pa productonan friew. Y pa cuminda cayente, percura cu e temperatura ta adecua pa mantene e cuminda cayente.
Segun señora Geerman, e regla di higiena personal tambe ta importante. Entre otro,e forma di laba man. Pa esaki ta exigi por lo menos un habon, un jug cu awa limpi pa laba man cada biaha cu ta necesario. Tambe bao higiena ta sugeri pa ta bon y limpi bisti. Y si acaso tin corta na man, pa pone pleister riba e herida. Percura cu cabey ta wanta. Si ta uza handschoen, mester toch keda laba man.
Señora Geerman a remarca cu na momento cu DVG constata durante control cu no tin carchi di salud, nan no por sigui bende y DVG ta cera e localidad. Y si tin mas hende cu si tin carchi valido, por sigui cu e bendemento.
E reglanan di higiena ta conta tanto pa tur esnan cu ta bende cuminda, como pa enan cu ta bay Carnaval y ta hiba nan cuminda. Mesun conseho pa nan ta pa hiba tipo di cumindanan cu no tin risico cu ta daña y por haci hende malo despues.
