Taxista Ronny Gomes ta boga:
- Pensamento cu kizas Setar, Elmar, etc, lo por sponsor
ORANJESTAD (AAN) E taxista, señor Ronny Gomes, ta elabora mas riba e situacion di trafico congestiona na Aruba, y el a referi, entre otro, na kico ta pasa, por ehempel, ora tin actividad di concierto den Convention Center.
El a bisa cu na Aruba nan ta gusta copia cos di afo, y ora bo tin cu pasa dilanti Renaissance, bo ta lubida cu tin otro negoshinan cu tambe tin ken mester haya taxi. E trahadornan mes, cu ta traha den e sector aki no tin lugar pa para nan auto. Hotelnan no tin suficiente lugar den parkinglot pa para auto. Unico hotel cu tin suficiente lugar ta Hyatt Regency. Gomes a reitera cu ta frustrante pa keda pega den trafico tur dia.
E ta boga pa traha dos rotonde den e area di hotel, un di nan na Palm Beach Plaza, y ora e ta wak cu Setar, WEB y Elmar y otro instancianan ta sponsor cierto proyectonan, e ta puntra su mes si traha e dos rotondenan ey no ta importante pa Aruba? Pasobra gobierno su contesta ta, cu no tin placa! El a comenta cu Eagle Beach awo ta yen di verkeer drempel y hopi hende ta keiro eynan. El a agrega cu si wak e caminda di Playa pa San Nicolas, 24 ora di e dia e caminda tin trafico. E poblacion ta creciendo y mester corda bon cu tur esnan cu ta bin keda na Aruba pa studia na e Universidadnan cu tin awo, ta busca auto, tur esnan cu ta core stage, mester di auto, tur e Airbnb ta busca auto; e poblacion a crece, el a reitera.
Segun Ronny Gomes, Aruba tin mas di 130 mil habitante. No ta pasobra tin demasiado auto, sino demasiado hende.
Nos muchanan cu aki 4 aña ta cumpli 18 no por bisa nan pa no core auto. Si na cierto momento 5 mil hende dicidi di bin biba na Palm Beach, con ta bay haci? Of 500 hende mes, unda ta bay pone nan? Ora bo ta bin Paseo Herencia no tin parkeo. Esun di Palm Beach Plaza ta yen tur dia.
“Unda mas tin pa bo sali keiro cu bo famia na Aruba? Esnan cu ta bin di Noord e unico caminda destina na nan, ta via CMB Bank”, segun Gomes a indica. Tambe na Playa e trafico ta keda pega na Downtown mas ora tin crusero. El a bisa cu tur hende ta reclama di taxistanan mientras cu e situacion ta wordo crea pa e trafico cu ta pega e 24 oranan di dia, na tur caminda di Aruba.
