Piano-Tecnico maestro Roy Sneek:
ORANJESTAD (AAN)—Maestro Roy Sneek a conta den entrevista cu DIARIO, cu na Aruba a restaura cuater piano completo, bao di su supervision. Tabata tres piano di cola y un vertical. Manera a wordo menciona den un prome articulo, e ta unico persona cu tin Licencia na Aruba como “piano-tecnico” otorga pa “Museum of The American Piano”.
“Restaura kiermen renova completamente e pianonan di mas cu 50 pa 80 aña bieu. Un tabata e piano di cola di Manchebo, cu anteriormente tabata den Talk of The Town, y tabata wordo toca mas tanto pa señor Ike Cohen. Despues Ike Cohen a tuma Manchebo over, y cu mi recomendacion pa cambia e martiunan como cu nan a bira hopi bieu y den mal condicion. Anto, señor Ike a wak mi haci e trabao, nan a bestel tur e material segun mi conseho. E otro dos pianonan di cola no tabata toca mes of tabata den masha mal estado y tur dos ta tocando awendia, manera debe ser. Nan ta parce pianonan nobo. E mantencion ta keda pa mi clientenan”, Maestro Sneek a menciona.
El a sigui splica cu na Aruba mayoria di piano tin 88 tecla, tin cu 85 cu ta baby piano, y tin mini cu tin 73 tecla. “E punto mas cardinal pa mi, locual ta regarda afinacion ta e oido. Na Merca no tabata permiti pa uza tuner (aparato pa afina). E tempo aya no tabata tin celular ni computer, mi mes tin full e curso graba riba cassette. Pa afina e piano mi ta uza e forki di afinacion”, maestro Sneek a señala.
El a menciona cu esnan cu ta afina via computer of tuner si esakinan ta daña, of bateria ta baha, etc., no tin caminda di bay anto nan no ta desaroya nan oido. Cu forki e ta hopi duradero y bo ta sigui desaroya bo oido.
Maestro Sneek a conta cu e ta wordo puntra si e por duna e curso atrobe. “Mentalmente y fisicamente, e capacidad tey cien porciento na e momentonan aki. E idea tey, pero ta varios factor ta hunga un rol pa e idea wordo concretiza”, el a indica.
CONDECORACION:
Finalmente, ta interesante pa menciona cu señor Sneek, na aña 2009 a wordo condecora como Ridder in de Orde van Oranje.
GRADICIMENTO:
“Un gradicimento na tur esnan cu por a duna mi sosten y empuhe pa e carera di 30 aña como piano-tecnico. Tambe na señora June Fagan, un Arubiano cantante di Coro di Dakota cu mi tambe tabata canta aden, y cu a percura pa mi tin alohamento y tur rekisito na Merca. Y e coro cu e tabata aden na Merca, mi a dirigi den un Misa Latino di Pasco 1991. Durante mi curso na Merca mi dos yiu y nan mama a bin Merca y hasta a atende un les di piano-tecnico, cu mi”.
Pa conclui, señor Sneek a expresa: “Tur dia mi ta reza Papa Dios pa duna mi e forza y sigui haci mi trabao, manera mester ta”, Maestro Sneek a conclui.
