Preparando pa acomoda e mega crusero Oasis Class
ORANJESTAD (AAN) – Director di Aruba Port Authority (APA), mr. Marc Figaroa, den conferencia di prensa Diahuebs mainta, a anuncia e inicio di e proyecto di dragamento (dredging), cu ta encera haci e limpieza di e canal, 100 meter bin abao, pa traha acomodacion, na prome instancia, pa e mega crusero Oasis Class di Royal Caribbean.
Señor Figaroa a splica cu esaki ta un “joint venture” di e compania local Varadero Caribe Aruba N.V, conhuntamente cu Ocean Group di Canada. Nan lo bay ehecuta e trabao aki.
Director di APA a menciona cu nan ta bay haci un limpieza di mas of menos 20 meter cubic, den preparacion pa e mega crusero Oasis Class.
El a splica cu pa hopi tempo caba APA ta den combersacion cu Royal Caribbean, pa na bin cu nan mega crusero den e parti zuid aki di e region, esta Aruba, Bonaire y Curacao.
Figaroa a menciona cu esaki ta necesario pa asina acomoda e mega crusero na un forma sigur. “Manera e minister a indica, e ta premira pa e prome siman di Mei nos por ricibi e Oasis Class, cu pa prome biaha e tipo di barconan aki ta yegando Aruba of den e region aki”, Director di APA a indica.
El a agrega cu e plannan ta hopi positivo pasobra lo bay tin hopi mas calls di e tipo di barconan aki, den e añanan venidero, y pesey e trabaonan menciona, ta sumamente importante.
Un trabao di un inversion di mas of menos 1.6 miyon florin cu APA mester a haci, y contando cu e “return investment” cu ta bin cu e tipo di barconan aki.
“Loke ta e parti di crusero, manera e minister a indica caba, nos a cera 2021 cu un total di 136.000 pasahero, cu ta como 16% compara cu 2019, cual tabata un aña record, unda cu nos a procesa 831.000 pasahero”, director di APA a subraya.
El a menciona cu omicron sigur a haci su impacto, y lamentablemente na Januari APA mester a confronta un 1.015 calls, cu a casi 30% di loke tabata planea pa Januari. “Gran parti tabata tin di haber cu e situacion di covid-19 aki na Aruba. Mi ta kere cu nos tur ta conoce con e situacion tabata, vooral e ultimo siman di December y e dos of tres prome simannan di Januari, unda cu e casonan a bay hopi halto”, Figaroa a indica.
Lamentablemente, hopi di e barconan crusero aki a opta pa no bin Aruba pa e riesgo di contagio pa nan mes no haya nan den problema abordo di e barco, Figaroa a agrega.
“Mi ta spera cu esaki ta pasando. Nos ta mira e futuro aworaki, cu nos por recupera si tur cos sigui bon, y nos no haya un otro wave, unda cu nos lo recupera mas of menos 60% di nos mercado bek”, Director di APA, mr. Marc Figaroa a expresa.
