Tur cuatro Ambulance nobo tin camera instala pafo rond di dje y tambe den su interior

ImSan ta contento cu e dos fabricantenan

• Tur ekipo paden tambe ta tecnicamente avanza y ‘state-of-the-art’ 

ORANJESTAD (AAN): Aruba a haya cuatro Ambulance nobo.  Sinembargo na comienso e plan tabata pa djis cumpra 2 Ambulance nobo (esnan di tamaño normal), como cu esey tabata e unico placa disponibel pa adquisicion di e unidadnan aki.

   Pero tabatin dificultad na fabricanan pa cumpli cu e demanda mundial di unidadnan di Ambulance, y esey a trece tardanza.  E siguiente aña a drenta, y pa casualidad danki na contactonan na Curaçao, a logra haya adres di un otro fabricante di Ambulance cu ta traha esnan ‘big box’.  Pa casualidad pa 2024, AZV a logra haya mas financiamento pa por adkiri dos di eseynan tambe.

   Danki na esey, Aruba a logra di haya 2 Ambulance di tamaño normal, y 2 Ambulance di tamaño grandi.   Nan a wordo manda pa Aruba na lunanan di Juli y Augustus.

   Director di ImSan, Dr. Rajnherc a splica cu nan a deal cu dos diferente compania, y nan ta masha orguyoso cu e resultado di nan escogencia.  El a agrega cu tur cuatro unidad di Ambulance ta bin ekipa cu lo ultimo den tecnologia, incluyendo camera cu ta graba constantemente tur cos cu tin dilanti y rond di e Ambulance, y tambe ta graba su interior.

   No ta djis e vehiculonan di Ford Transit, y Ford F350 ta nobo, sino tambe tur ekipo medico cu tin den e Ambulance y cu e enfermeronan mester pa completa, ta full nobo y ta ‘state-of-the-art’.

   Dr. Rajnherc a splica cu ImSan ta un Hospital acredita pa JCI na 2023, y tur enfermero di Ambulans ta completamente educa, igual cu e sistema na Hulanda, y segun e schedule nan conocemento ta haya update for di Ambulance Zorg di Hulanda, cu ta viaha bin Aruba pa duna e lesnan y tuma nan certificacion.

  Esaki ta e unico forma cu e personal por sigui cumpli cu e necesidadnan y nan posicion.  Pa 2025 e bij-scholing lo tuma lugar atrobe.