ORANJESTAD (AAN): Ya caba pa algun aña, e islanan ABC a bin ta confronta cada verano cu un mancha bruin di un tipo di yerba di lama cu ta wordo yam
a ‘Sargassum’. Hopi biaha nan ta aglomera na e costa panort di Aruba, unda nan ta keda pega basta diki riba barancanan. Tambe algun lugar, finalmente ta heavy equipment di DOW a wordo usa pa asina yuda haci beachnan limpi.
Durante 2019 y 2020, e mancha di yerba aki tabata hopi den noticia, y con e ta yega prome na costa di Bonaire, y poco-poco ta sigui bin pabao.
Cu yudanza di satelite, e University of South Florida (USF) hunto cu NASA na Merca a cuminza tira un bista riba e fenomeno aki y ta siguiendo nan paso. Y pa 2021 e pronostico no ta mustra asina alentador. “E crisis ta na caminda un biaha mas pa costa di tur isla y pais na rand di Caribe,” ta loke e specialista y oceanografo marino Alejandro Bravo Quesada a bisa. E ta director di Ocean Solutions Mexico.
CRECIMENTO GRANDI:
Segun e informe nobo, di December 2020 pa Januari 2021, e cantidad di Sargassum den lama a subi for di 3.2 ton, pa awor na 4.6 miyon ton na Februari 2021. E cantidad aki ta 4 biaha mas hopi compara cu loke a wordo detecta e mesun temporada na Januari di aña pasa. Esaki por nifica cu aki algun luna, e marea bruin di Sargassum lo por bay transforma e paisahe di awanan blauw y beach blanco, den un pesadiya un biaha mas.
Tabata na aña 2015 cu cientificonan a cuminza observa e patronchi y comportamento di Sargassum cu mas atencion. Asina a bin haya sa cu e temporada cu nan ta florece ta start na comienzo di aña y ta haya e piek den zomer, y baha bek pa winter. A nota cu un aña e ta bin masha hopi mes, y e siguiente aña e ta poco, y asina ta ripiti.
Cu un largura di 86 kilometer, e faha di Sargassum ta aworaki pazuid di Islanan mas pariba di Caribe, cu ya caba a bin ta nota algun area di e yerba aki yegando. E dinamica di coriente di lama y e trayectoria cu nan a sigui den añanan anterior, ta sugeri cu Sargassum lo bay pasa den henter region di Caribe te ora cu e yega costa di Mexico y cambia su rumbo pa parti zuid di Florida.
Y net den zomer ora cu islanan ta yena cu turista na beach, e ora ey e lama bruin, cu holor masha malo mes, cu hopi bestia di lama morto, y tonelada di yerba acumula na e costa, ta e imagen cu e turistanan ta yega pa mira. Pero e mal imagen ta djis e punta di e iceberg di un ‘desastre ambiental’ pa henter e region, si acaso esaki no wordo controla pronto, segun e investigador Rosa Elisa Rodriguez na Universidad Nacional Autonomo di Mexico (UNAM).
Aworaki no ta existi ningun cifra di consensus riba e impacto economico di Sargassum den Caribe. Den un charla comparti na University of West Indies na 2019, Edmund Bartlett (co-presidente di Global Tourism Resilience and Crisis Management Center) a bisa cu e costo anual di limpieza rond di e islanan di Caribe tabata alrededor di 120 miyon Dollar.
IMPACTO RIBA TUR COS:
Esey no ta inclui e cantidad di placa cu cada hotel ta gasta pa haci e beach nan dilanti limpi tur dia. Propietarionan den Caribe ta calcula cu e costo ta banda di 60.000 Dollar pa aña pa un Hotel mediano. E cifranan aki ta djis papia di costo di limpieza, sin considera e perdida di entrada pa un posible caida di yegada di turista. Debi na Sargassum, entre 2018 y 2019 mes, Cancun a conoce un caida den ocupacion hotelero cu a hasta yega 15 porciento. Awor pa colmo den 2020 y 2021, hotelnan a sufri e crisis di Pandemia tambe, y esey a pone cu ya nan no ta pone e problema di Sargassum na e prome lugar di preocupacion mas. Pero si no haci algo pa e situacion ecologico aki, e lo por empeora aun mas.
E acumulacion di Sargassum na costa ta causa impacto riba bida marino, mangelnan, rifnan, y beachnan, y tambe ta un menaza pa economia di e regionnan cu ta biba primordialmente di turismo, manera Aruba, Jamaica, Trinidad & Tobago, Republica Dominicana, Cancun, Cozumel, Cuba, Belize, y mas.
Y e imagen di Satelite di NASA ta mustrando caba con e mancha di Sargassum na Februari tabata cruzando Atlantico rumbo pa Caribe. Nan a cuminza yama e area entre Brasil y Africa na parti zuid di Atlantico, como “Lama nobo di Sargassum”. Esey ta pone cu comunidad cientifico a cuminza cu un buskeda desespera di solucion, pero te cu awor no a yega na ningun accion pa haci algo riba esey. Pues pa awor, e lo bay ta un dolor di cabez pa paisnan den Caribe den lunanan venidero.
https://diario.aw/categories/noticia/general/tur-cos-ta-mustra-cu-caribe-lo-bay-tin-mucho-mas-dolor-di-cabez-cu-sargassum-den-2021#sigProIdb203a96629