ORANJESTAD (AAN): Diahuebs durante un conferencia di prensa Rudy Leysner di Grupo Nucleo
a papia riba un actividad cu un biaha mas Grupo Nucleo ta bay organiza, como cu luna di October ta luna di Adulto Mayor.
Esaki ta bay ta un anochi di intercambio cultural entre hobennan y adultonan mayor, cu ta bay tuma lugar Diaranzon 19 di October na Cas di Cultura di 6’or pa 9’or di anochi.
Leysner a splica cu ta bay tin presentacion di 12 grupo di personanan di 60 plus cu lo demostra nan pasion pa entre otro canto, baile, poesia y arte.
“E gruponan aki lo duna presentacionnan completamente atractivo y creativo, di cual e publico lo goza hopi”, segun Leysner.
El a sigui bisa cu durante 5 pa 6 luna e gruponan a prepara nan mes hopi bon y a traha hopi duro pa ta cla pa e anochi aki, unda cu e boluntarionan tras di cada grupo ta e curazon di cada show.
“Tur e 6 añanan cu nos a organiza e evento aki bo ta wak cu cada biaha tin cosnan diferente pa disfruta di dje”, segun Leysner, kende a indica cu mirando e interes grandi e aña aki, quizas lo organiza esaki otro aña riba dos anochi.
