ORANJESTAD (AAN): Despues di reuni cu Formador, señor Patrick Werleman di Stichting Sportsubsidie Aruba (SSA) a duna un declaracion na prensa,
na unda el a indica cu e reunion tabata uno hopi fructifero y nan a papia riba diferente topico, como tambe a trece dilanti algun punto di atencion, cu nan ta kere ta importante pa desaroyo di deporte en general, pero tambe den organizacion di deporte.
Señor Werleman a bisa cu un punto crucial pa na ta esun di finansas, y nan a trece nan preocupacionnan dilanti y desaroyo di e ultimo añanan, algo cu a limita nan seriamente pa yuda e organizacionnan deportivo. El a splica cu esaki ta refleha bek, no solamente riba nan, pero den comunidad en general y comunidad deportivo.
Nan a trece varios punto importante y kico ta e siguiente pasonan pa mehora e situacion di deporte na Aruba. Ora ta papia di deporte, ta importante pa distingui e diferencia entre deporte elite, deporte competitivo y deporte recreativo. Den nan bista, deporte recreativo ta hopi importante, no solamente pa desaroya deportistanan nobo, como tambe pa salud di comunidad. Den su opinion esey ta un punto hopi importante pa un Gabinete, pa motibo cu salud ta refleha bek na un gobernacion y tambe den gastonan medico y di finansas.
Ta hopi importante pa desaroya deporte y tambe e organizacionnan y nan ta kere cu nan lo por haci un mihor trabao cu e siguiente Gabinete.
Stichting Sportsubsidie Aruba ta yuda alrededor di 45 organizacion deportivo cu nan ta yuda cu subsidio y nan tur aña nan ta haya mas o menos un suma di 8 pa 9 miyon di florin na peticion di subsidio. Si nan mesun fondonan ta limita, esaki ta causa cu nan no por yuda esnan cu ta acerca nan pa un subsidio.
