Negoshi chikito di fruta y berdura ta un ehemplo: - ORANJESTAD (AAN) – Meymey di un pandemia, cu ta mustra cu ta leu di disparce, toch tin hende cu ta kere den Aruba su economia
y ta lanta un negoshi chikito, den diferente bario y esun cu ta hala mas atencion ultimo temponan ta negoshi di fruteria y berdura.
Por nota cu varios di e personanan cu ta lanta e tipo di negoshi aki ta residentenan sea Colombiano of Venezolano. Un mercado cu sigur ta yuda pasobra nan ta ubica den areanan unda no tabata tin un lugar cu ta bende mas tanto, fruta y berdura, y ta trata di negoshinan chikito.
E personanan aki nan mes ta busca nan productonan segun DIARIO por a compronde, sea di un agencia local cu ta bende cu diferente otro comerciante, of nan tin un manera pa importa nan productonan, of nan mes ta sembra y cosecha algun di e productonan, y den cierto sentido nan ta yena e bashi cu e barquitonan venezolano a crea, door di a cera e frontera.
En todo caso, ta interesante cu e personanan residente aki ta inverti maske con chikito nan por hacie, na Aruba y ta presta un servicio na comunidad, sin causa competencia pa otro negoshinan pasobra nan ta situa leu di supermercadonan grandi cu ta esnan cu mas tanto ta importa cierto cantidad di fruta y berdura, for di kizas un par di pais Latinoamericano.
Ta boluntad y creatividad mester tin pa sali dilanti di un pandemia manera Covid-19 y su variantenan, pero tambe mester tin hopi confianza den Aruba su economia pa mas poco cu e ganashinan por ta, y specialmente aprecio y gratitud pa nos mes comunidad.
