ORANJESTAD (AAN): Tin personanan cu ta reacciona indicando cu nan kier sa cual ta e 240 remedinan cu a wordo kita for di e Lista Positivo di Remedi. Sinembargo docternan ta basa nan mes riba e punto
di bista cu e pashent ta haya un receta unda tin un of algun remedi cu por ta no ta riba e lista mas.
Pa esaki AZV ta enfatisa cu ta importante pa ora un pashent bay cerca su docter di cas, puntra cual ta e remedinan cu no ta wordo cubri mas pa AZV si den e caso tin remedinan alternativo.
Den e caso aki no ta necesario pa e pashent haya sa cua ta e 240 remedi cu ta riba e lista. Ta trata akinan di remedinan cu ta 'Over The Counter' (OTC) of cu no ta existi mas.
AZV ta di opinion cu pone un poster na e consultorio di e docternan no ta algo practico.
E docter di cas toch por print e lista pa e pashent den caso cu e pashent ta puntra. Tambe riba e website di AZV tin e lista disponibel.
Solange Tchong, PR di AZV a señala cu berdad por pidi e docter di cas pa print e lista. Pero mester tene cuenta tambe cu tin actualisacionnan y por ta ta lubida di wak e lista corecto y esey por trece confusion.
Si un asegurado kier haya informacion e miho manera ta pa e bay riba e website di AZV (www.azv.aw) y eynan ta haya tur informacion. E informacion ta poni riba nan frontpage como prome informacion.
Tur biaha cu ta actualisa e lista, e fecha ta aparece riba e lista, a remarca.
E docternan tambe tin un web portal di AZV y eynan ta e instrumento di semper unda no solamente ta publica e tipo di informacion aki. Esey ta e plataforma unda por wak por ehempel, e aseguradonan den 'real time' y esaki ta existi pa añanan caba.
E website mes ta wordo update tur momento cu tin un cambio, Tchong a duna di conoce.
Banda di esaki, Docter Joost Samuel, Chief Medical Officer na AZV a indica recientemente durante un conferencia di prensa cu e problema cu e lista ta cu esaki a crece durante e ultimo 20 añanan. Mas y mas remedi a bin riba dje.
Tabata mas facil pa pone un remedi riba dje na lugar di kita remedi. E lista a crece y crece y tabata un lista "cu por bisa ridiculo", a expresa.
Cu e situacion, cu Covid-19, cu tin cu bespaar, esey tabata e 'spark' pa bisa cu awor tin cu hac'ie y el a wordo haci, Samuels a declara.
