ORANJESTAD (AAN): For di Willemstad a bin e informe, cu a raiz di e denuncianan anonimo haci na Colegio di Supervision Financiero, a efectua un investigacion independiente riba encargo di su
presidente, Sr. Raymond Gradus.
Resultado di esey ta cu a yega na e conclusion cu no tabatin violacion di integridad ni comportamento excesivo. Loke si a constata ta problema di descuido. Ta necesario pa implementa den Secretariado di Cft mehoramento den e organizacion administrativo y formulacion mas cla di e proceduranan interno. E denuncianan anonimo, cu a haci na cuminsamento di e aña aki, tabata concerni acusacion contra e Secretariado di e tres Colegionan. E agencia independiente EBBEN Partners a efectua e investigacion di hecho.
Riba esaki Raymond Gradus a duna e siguiente comentario: “Aunke a haci e denuncianan di forma anonimo, mi a considera cu tabata mi responsabilidad pa tuma e acusacionnan ey na serio y percura pa un organismo independiente investiga nan mas pronto posibel. Esey a tuma lugar caba y nos a ricibi e relato di e investigacion.”
"Apesar cu, a base di e investigacion, no a constata violacion di integridad ni comportamento excesivo, si ta sali na cla e necesidad di implementa den termino general mehoracion den e organizacion administrativo y di formula mas cla e proceduranan interno,” Gradus a comenta.
Gradus ta señala cu a raiz di e conclusionnan di e investigacion di hecho a tuma diferente decision. Asina, por ehempel, lo formula mas cla e proceduranan rond di tumamento na trabao di personal temporal y di biahamento pa exterior, y den futuro lo no duna gratificacion den natura mas. Ademas, lo elabora e maneho di gratificacion, Presidente lo aprobe y Secretario lo aplike.
Tambe riba un otro tereno lo introduci un coreccion. Esta, te y cu december 2019 tabata paga anualmente un gratificacion di Pasco di 1.000 Florin netto na tur empleado di Secretariado. Pa e personal local tabata converti e gratificacion ey na un suma bruto. A keda sin realisa e adaptacion administrativo ey pa e personal cu a bin djafo. Awor lo consulta cu Ministerio di Asunto Interno y Relacion den Reino pa determina con por realisa ainda e hacimento bruto pa e empleadonan ey. Cu un auditoria lo comproba mas despues cu a cumpli corectamente cu e procedura di administracion di salario.
“Resumiendo: Cft tin un funcion ehemplar. Ta importante pa tur hende na Cft mustra un comportamento di integridad total. A start un trayecto pa sigui aumenta e consenshi di integridad den e organizacion cu yudansa di un persona confidencial,” Gradus a finaliza bisando.
