TUI Fly celebrando 20 aña di ta bulando pa Aruba

Na Schiphol a treat tur pasahero riba Dialuna...

ORANJESTAD (AAN): E vuelo di TUI fly OR 381 a keda festivamente despedi na Aeropuerto Schiphol riba ayera Dialuna 3 di November. Cu e vuelo aki, TUI fly ta celebra un logro special: e compania di aviashon ta bula entre Amsterdam y Aruba pa exactamente 20 aña e aña aki.

   Prome cu salida for di Amsterdam, un delegacion di TUI y Schiphol a conmemora e momento aki, y pasaheronan a ricibi un recuerdo di e vuelo special aki.

   Arjan Kers, Director Gerente di TUI Hulanda y Belgica a declara: “Cu e ruta Amsterdam-Aruba, nos ta trece hopi turista pa e isla tur aña, ademas e ta un conexion importante entre Hulanda y tambe cas pa e localnan. P’esey mi ta orguyoso cu nos ta celebrando 20 aña di conexion awe cu Aruba.”

   Popularidad creciente: Aruba ta un di e destinacionnan Caribense mas popular di TUI pa dos decada caba; e popularidad ey ta cresiendo. Mas y mas e turista hulandes ta descubri e isla diverso aki cu su playanan bunita, mundo bao di awa fascinante, y hendenan hospitalario. Tanto benta di vakantie den pakete como pasashi individual ta aumentando compara cu winter 2024.

   Vakantie den pakete ya ta mustrando un aumento di 27% pa e temporada di winter venidero y actualmente, a bende 50% mas pasashi compara cu den e mesun periodo aña pasa. Esaki a pone cu e organizacion di viahe a aumenta su capacidad di vuelo pa Aruba (+25%).

   Acomodacionnan chikito ta den demanda: Mientras cu resortnan manera RIU Palace, Divi Resorts, Renaissance y Courtyard by Marriott ta atrae mas turista, e parti di acomodacionnan chikito tambe ta creciendo; manera Paradera Park, Arubiana Inn, y Del Rey Apartments como e tres faboritonan.

   E popularidad creciente di e tipo di acomodacion aki ta visto for di e cifranan di crecemento espectacular na TUI: un aumento di 100% den winter 2025 compara cu e temporada di winter anterior. Nobo den e oferta di TUI ta Secrets Baby Beach Aruba, e prome resort y esun di mas nobo pa e Hyatt Inclusive Collection pa adulto so.

   Direct cu Boeing 787 Dreamliner: Riba un di e potretnan saca door di DIARIO na Mei 2014, ta ilustra e prome biaha cu un Boeing 787 a ateriza na Aruba, y e ta di TUI fly.  Nan ainda ta e unico aerolinea Hulandes cu ta ofrece vuelonan directo entre Amsterdam y Aruba henter aña.

   Riba dialuna, tin un vuelo directo for di Amsterdam pa Aruba, y riba diabierna, por bula directamente for di Aruba pa Amsterdam. E vuelo ta worde opera cu un Boeing 787 Dreamliner. Abordo, pasaheronan por scohe for di opcionnan di asiento Economico, Comodidad y Deluxe.