*E studiantenan a logra captura e realidad social den imagen visual
ORANJESTAD (AAN): Dialuna anochi, e hall di Biblioteca Nacional Aruba tabata completamente yen durante e apertura oficial di e exposicion di potret ‘Framing Social Problems and Solutions’, organisa pa Departamento di Trabao Social y Desaroyo di Universidad di Aruba.
Entre e publico presente tabatin mandatario, parlamentario, invitado especial y miembronan di comunidad cu gran interes den tema social.
E proyecto ta uno cu hopi balor educativo y humano, y ta trece ariba mesa temanan importante no solamente pa studiante y futuro profesional, sino tambe pa e comunidad arubiano.
E manera den cual studiante a logra captura e realidad social den imagen visual, y ofrece posibel solucion, a laga un profundo impacto riba tur asistente.
E exposicion ta un evidencia di e compromiso di Universidad di Aruba pa forma profesionalnan cu un bista critico y socialmente comprometi, cu ta prepara pa enfrenta e desafionan real cu ta existi den Aruba, Latino America y e region Caribense.
Exposicion ‘Framing Social Problems and Solutions’ lo keda habri te cu dia 18 di juni 2025, y lo sigui inspira pa dialogo y reflexion den e comunidad.
