Jessy Ras di Formacion Social (SVT):
ORANJESTAD (AAN): Fecha di e trayecto nobo di Formacion Social (SVT) a ser hala di maart pa augustus. Señora Jessy Ras di SVT a anuncia cu SVT 21 lo cuminsa dia 17 di augustus 2026. Inscripcion ta habri desde januari caba y tur hoben mucha homber entre 17 te cu 25 aña, cu a drop out di scol y no tin mucho motivacion pa sigui studia, y cu ta interesa pa cuminsa e trayecto, por inscribi.
Señora Ras ta pidi pa inscribi mas pronto cu ta posibel pa motibo cu lo mester haci e proceso di seleccion y mas lihe hobennan aplica, mas lihe ta cuminsa haci e actividadnan di seleccion cu ta necesario pa drenta SVT.
El a agrega cu logisticamente a dicidi di cambia e fecha di maart pa augustus pa asina mas hoben inscribi. Tin un cupo di 25 hoben y ta spera cu awo cu tin mas tempo, mas hoben dicidi di inscribi, pasa den e actividadnan di seleccion y cuminsa e trayecto nobo na augustus proximo, pareu tambe cu e aña escolar nobo.
SVT ta un trayecto pa yuda y guia hobennan pa haya disciplina, structura y haya mas conocemento di nan mes pa nan crece mas. Señora Ras a enfatisa cu SVT no ta un scol, y ora nan caba e trayecto, nan no tin un ofishi. Pero nan lo ta miho prepara pa por drenta scol bek of drenta e area laboral y ta mas motiva pa contribui na nan pais.
