Aruba a coy e bandera y sigui lucha pa reforma Reino Hulandes
*Gabinete Evelyn Wever-Croes a entrega Aruba e base di soberania
*E herencia di logro di Betico Croes a bira reconocemento mundial awe
ORANJESTAD (AAN) — Tras di tur logro, tin un lider cu su vision y su mision. Na 2024 Aruba ta prepara, pa celebra e Dia di Himno y Bandera, cu ta raiz y simbolo di e logronan mas importante di Aruba.
Ora papia di un lider, ta papia di un dirigente, cu no ta uza un ilusion of necesidad di un Pueblo pa e bira importante of drenta historia.
Ora papia di un lider, ta papia di un persona, cu ta splica Pueblo con pa alcansa e deseonan y necesidadnan grandi di un Pueblo pero tambe ta entrega un plan concreto, cu pasonan concreto y un lucha basa riba vision den cual e ta entrega su mes completamente.
Na 2024, Aruba ta celebra su Dia di Himno y Bandera cu ta e simbolonan di e pais Aruba cu a bira realidad dia Prome di Januari 1986.
DIARIO lo a traiciona motibo di su existencia, si awe e no splica generacionnan nobo di Aruba, pakico awe Aruba ta ocupa un puesto di honor na mundo pa su logronan historico.
Dia Prome di Januari 1986, redaccion di DIARIO no tabata parti di celebracion, pero parti di e dolor y angustia grandi di Aruba, cu tabata despedi di e homber cu a entrega Aruba, su Himno y Bandera cu a bira e simbolonan directo di su vision y su logro historico di cambia historia di henter Reino Hulandes.
DIARIO, cu a nace pa sostene e lucha pa Status Aparte di Aruba, tabata parti di e pais cu a despedi di Betico Croes, e lider cu a cumpli cu su promesa pa entrega Aruba e dignidad di pais den Reino, a pesar di tur problema cu esaki a encera.
Ni morto por a pone un fin na e logro di Betico Croes, cu a laga atras e mandato pa duna continuacion na su lucha hasta si e mes perde su bida den e lucha.
E instruccion mas importante di Betico Croes tabata, pa si e no mira final di su lucha, Aruba hisa e bandera y sigui lucha.
Bou mando di Ministro Presidente Nel Oduber, Aruba a sigura cu e lo goza di Status Aparte, e formula pa felicidad di Aruba, cu Betico Croes a asegura. Bou mando di e prome gabinete di e sucesor di Betico Croes, Nelson Oduber, a schrap e fecha di independencia, cu Reino a exigi.
Respet pa Aruba den Reino, tabata e logro mas grandi di Betico Croes y su formula pa cambio a wordo uza pa cambio total di Antia Hulandes y Status Aparte pa Curacao y Sint Maarten tambe.
E lucha di Betico Croes a produci fruto pa henter Reino hasta despues di su morto y na e momentonan cu abuso di placa di Pueblo a deshaci di e resultado di un lucha sagrado di Betico Croes na momento cu na 2014 Hulanda a haya importunidad pa implementa supervision financiero na Aruba.
Florin di Aruba, pa cual Betico Croes a lucha, casi a wordo destrui na momento cu Gobierno Mike Eman a baha BBO na mitar pa Mike Eman por a bira Prome Ministro y asina crea e desastre financiero cu a deshaci di Status Aparte.
Na 2017 e momento a yega pa espirito di e lucha berdadero y vision politico, renace na Aruba cu entrada di e Gobierno di Evelyn Wever-Croes cu a coy e bandera di Aruba pa debolbe na Aruba e dignidad hancra den e Himno “Aruba dushi Tera”.
Ni perdida di e mercado turistico di Venezuela, ni e peso enorme di debe nacional cu el a hereda, ni pandemia y recesion mundial, por a stroba cu awe e bandera di Aruba ta simbolo di e forma cu Aruba por atende cu su autonomia a base di e maneho Evelyn Wever-Croes.
Instancianan cu a nace a base di e medidanan cu supervision di Aruba a base di Gobierno Mike Eman, a exigi, awe ta elogia e forma cu maneho responsabel di e pais ta tuma lugar bou gobernacion encabeza pa Prome Ministro Evelyn Wever-Croes.
Awe Aruba ta e unico pais den Reino, cu por entrega na mundo, e prueba concreto cu e por a cambia e desastre financiero di 2017, den un maneho cu segun supervision di Reino, mester haya continuacion.
Awe ora e Himno di Aruba resona, Aruba orguyosamente por hisa su bandera y entrega na mundo, e resultado di su Status Aparte den Reino Hulandes.
Awe Aruba ta bolbe splica mundo henter, kico liderazgo politico mester encera, na momento cu Gobierno Evelyn Wever-Croes ta entrega e prueba cu el a sigui e mensahe di Betico Croes pa hisa e Bandera, canta e Himno y lucha pa e Aruba cu na 2024 orguyosamento ta entrega Reino logro di un maneho ehemplar y visionario!
E prueba a bolbe wordo entrega cu pa papia di un lider, mester papia di un lucha, vision y mision cumpli!
