Prome Minister Evelyn Wever-Croes:
*un pabien na Aruba cu e celebracion grandi aki
ORANJESTAD (AAN): Prome Minister Evelyn Wever-Croes di curason kier manda su deseonan pa henter Aruba pa Dia di Himno y Bandera. Esaki ta un dia pa para keto y celebra e orguyo di ta un Arubiano. Pa celebra e amor cu nos tin pa nos dushi Aruba. Pa celebra e respet cu nos tin pa nos himno y nos bandera.
Den e dianan aki Prome Minister a bishita scolnan y a wak con nan ta preparando pa e dia grandi aki y a expresa cu e ta sinti un satisfaccion grandi pa wak con bon prepara e muchanan ta pa e dia aki. Nan a mustra nan conocemento di Aruba su cultura y historia y semper a mustra nan curiosidad pa siña mas di nan dushi isla. Prome Minister ta manda danki di curason na esnan cu ta inculca e amor aki den nos muchanan.
“Ban celebra Aruba, ban celebra nos union, nos exitonan y e orguyo di ta Arubiano. Cu Fe, optimismo y determinacion nos lo sigui traha pa hiba Aruba padilanti. Pabien Aruba riba nos Dia di Himno y Bandera”, Prome Minister a expresa cu hopi orguyo.
Rond di nos isla tin varios actividad en conexion cu nos Dia di Himno y Bandera. Di parti di Gobierno y Comision Celebracion Dianan Nacional (CCDN), lo tin Manifestacion Cultural dia 17 di maart na Plaza Libertador Betico Croes cuminsando for di 6’or di atardi na unda tin diferente entretenimiento cultural como tambe cuminda y cos dushi tradicional. Tambe lo tin bente di artesania. Dia 18 di maart, Dia di Himno y Bandera lo tin e Ceremonia Protocolar cu lo tuma luga na Plaza Libertador Betico Croes cuminsando for di 9or di mainta. Despues lo sigui e tradicional marcha di gruponan uniforma.
Den nomber di Gobierno Di Aruba, Prome Minister ta invita pueblo henter pa asisti na nos actividadnan tradicional y celebra Dia di Himno y Bandera den union. Feliz Dia di Himno y Bandera.
