ORANJESTAD (AAN)-- Aunke por asumi cu e situacion di transporte publico “pirata” ta sosode rond di Aruba,
den e area cu ta birando un plaga cu molester constant ta entre Ponton y Noord.
Chauffeurnan cu ta ofrece e servicio ilegal aki, den e ruta menciona, ta hopi. Na Ponton, por ehemplo no tin un bushalte, mucho menos un habri pa e pasaheronan warda bus na un manera un tiki drechi sea bao calor sofocante of ora tin yobida.
Bayendo Noord solamente un bushalte tin dilanti e supermercado grandi na Shaba. Y na momento cu tin pasahero wardando bus, diripiente ta bin no uno, pero dos of tres A-Auto, cu ta duna servicio pa 5 florin (minimo). Y bao di e mata di kwihi na Ponton riba e acera hancho banda di unda tabata tin e borchi grandi di ex-Wema, e pasaheronan ta wordo sorprendi pa chauffeur cu ta subi acera y diripiente ta puntra patras “bo ta bay Playa? Subi, duna mi 5 florin”, y no tur hende ta gusta e manera aki. No obstante, hende cu ta laat pa trabao of tin pura pa yega otro caminda si ta uza e servicio aki, sin tene cuenta cu por ta peligroso. Prome, e chauffer no tin permiso pa core como bus, nan no tin un seguro pa responde pa e pasahero(nan), si tin cualkier incidente riba caminda, tin biaha nan ta stroba Arubus pa e pasahero subi e bus, y pa colmo tin chauffeur cu ora e pasahero nenga ta rabia, ta papia mahos cu ne, y ta tribi hasta bis’e “sigui warda, awe bus di Ponton no ta core”! Di berdad ta hopi incomodo.
Autoridad concerni no ta mustra cu ta haciendo algo pa structura e parti di transporte publico cu no ta Arubus pero autobus. Casi por bisa cu ta un milager pa wak un autobus pasa na Ponton, specialmente den direccion pabao. Nan na lora den e rotonde di Tanki Flip tuma otro direccion pa yega Playa, pa motibo cu e trafico ta hopi druk for di mainta trempan 24/7. Di otro banda Arubus Ponton ta core cada ora entre e terminal Oranjestad y Noord. Meymey di e orario ey no tin bus, pasobra no tin suficiente pasahero pa e area. Ademas cu despues di merdia tampoco tin Ponton te cu 3’or y mey cu ta sali di e terminal na Oranjestad bay Noord, y ta tarda mas cu mey ora pa bira bek bay pabao. E transporte pirata ta un competencia inhusto pero tambe a bira un necesidad pa hopi hende, y ta keda na autoridadnan concerni tuma esaki na serio, y traha pa un bon solucion.
