Maikito Croes di Grupo di Betico:
*E seccion dilanti stage ta full bendi caba
ORANJESTAD (AAN)-- Maikito Croes, integrante di Grupo Betico, den conferencia di prensa relaciona cu nan concierto dia 5 di November venidero, na Renaissance Conference Center, a elabora tocante e diferente seccion cu ta bay tin den e ballroom.
El a splica cu e area preto ta e stage na unda e grupo ta bay ta presentando, y a menciona cu e prome seccion, cu ta dilanti escenario ta full bendi caba. El a agrega cu den otro conciertonan nan cantidad di mesa tabata limita y tin hende cu comenta riba esaki, y consecuentemente a dicidi di haci algo diferente, y bin cu mesa di diez persona, y ademas a pone algun stoel apart pa hende cu no por cera e mesa di diez persona, por sinta apart.
Tambe a pone na final di e sala, banda di e stoelnan, “cocktail table” di cinco persona, ya cu tin hende cu no kier sinta pero balia so, aunke unda cu e hendenan ta sinta nan por lanta balia henter anochi.
Maikito a reitera cu unico seccion cu ta “sold out” te aworaki ta e dos rijnan full dilanti cu ta Gold. E demas seccionnan ainda tin mesa habri.
El a invita henter Aruba pa no warda te ultimo momento, pero reserva mesora pa asegura bo espacio den e Gran Concierto di Betico “Nostalgia di Fin di Aña” via telefon what’s app di Grupo di Betico.
“Bo conoce e cancionnan, bin sinti e energia en bibo, y ban canta y balia hunto cu e Grupo di Betico, e gran celebracion di Nostalgia di Fin di Aña”, Maikito Croes a reitera.
