Trahadornan di SADA a manifesta relaciona cu caminda den mal estado pa yega Oficina di Douane

Raoul Wever Vicepresidente sindical a indica:

*Yobida a causa hopi buraco grandi! 

ORANJESTAD (AAN) – Miembronan di Cuerpo di Douane tabata tin un paro di labor diahuebs mainta pa protesta tocante e situacion malo di e caminda pa yega na e oficina principal di e edificio nobo, na Bushiri,  na unda Douane a muda poco luna pasa.

            Den entrevista cu e vicepresidente di SADA, Raoul Wever, el a splica cu e caminda ta di santo y ora tin awacero buraconan grandi ta habri y e autonan UTV cu ta core eybanda ta keda coba e caminda y habri’e mas.

            “Aworaki e caminda ta den un estado sumamente malo, y ta agradable core bo auto eynan, bo ta daña bo auto y e trahadornan tin cu yega trabao y ora bo bay break bo tin cu bay bek, y ora bo tin cu bay docter of bay un reunion, bo ta pasa eynan y atrobe bo ta daña bo auto asina”, ta palabranan di señor Raoul Wever, di SADA.

            El a menciona e caso di un cliente cu ora a bay bishita e edificio, ora a trata di evita e buraconan, a bay pasa un lodo diki y su auto a pega. “Esey no por, un cliente ta suppose di yega e edificio pa Douane por brinda e servicionan na pueblo”, Wever a relata.

            El a comenta cu el a papia cu e director di Douane ken a splic’e cu el a manda mail tocante e situacion di e caminda, y e proceso ta cana pero ta dura su tempo. “El a haci e peticion na November, despues cu yobida a cay y e buraconan a cuminza bira grandi. Pero e mester a hacie ora nan a firma e contrato, segun mi na Juli of augustus aña pasa, pasobra e caminda tabata malo caba y eynan el a faya”, vicepresidente di SADA a señala.

            E autonan di e trahadornan a cuminza haya daño y awo e pregunta ta “ta ken ta bay paga pa drechamento”. Trahadornan ta pidi si gobierno por haci algo, pa bin raspa of basha granite of otro, pa alivia e situacion te ora te ora cu por yega na drechamento di e caminda”, Raoul Wever, vicepresidente di SADA a señala.