Nan ta exigi haya nan placa bek
ORANJESTAD (AAN): Malcontento ta sigui entre e trahadornan di Post Aruba NV. Esaki ta debi cu diripiente gerencia no kier sigui cumpli cu e CAO existente, y ta pushando pa bin cu un Contrato Colectivo nobo.
Debi na esaki, hopi trahador a bay atras cu 105 Florin, y esey ta e fuente di tur e disgusto cu tin na Servicio Postal.
Tempo cu esnan di Post Aruba NV mester a entrega durante e Pandemia, nan a haci esaki sin problema. Pero awor cu nan tin di haya nan parti tambe bek, diripiente Post Aruba NV ta bin bisa cu ‘no tin placa’. Siendo cu nan a tene e placa di tur trahador aden!
Pues tur cos ta draai rond cu trahadornan ta exigiendo pa nan haya e 105 Florin aki bek. Como cu anteriormente gerencia a bisa cu nan tin e “placa wanta”, y awor ta saliendo na cla cu esey no ta e caso.
Como cu Post Aruba NV no a cumpli 2 aña cune, e suma di 105 Florin aki awor a redobla y a bira 210 Florin.
Trahadornan ta convenci cu esey ta e motibo cu e compania ta buscando cueste loke cueste pa cambia e contract di CAO cu tin.
Considerando e hecho cu e trahadornan no ta hayando ningun contesta di gerencia, nan a dicidi siman pasa Diahuebs 22 di September, pa tene un walkout di 2 ora largo pa asina spera di por haya contesta. Pero e contesta nunca a bin, y trahadornan a bay labora bek.
E ora a dicidi cu Diabierna ta bay tene un walkout atrobe, pero e biaha aki di 4 ora largo pa mira si asina kizas gerencia lo spierta di soño. Pero atrobe riba 23 di September esey no a socede.
E shopsteward di Sindicato SEPPA, esta Eusebio Kelly cu ta representa e trahadornan a indica cu pa tal motibo riba Dialuna, nan a dicidi na tene un walkout di 8 ora largo pa e asunto ey. Pesey mes henter dia Post Aruba NV tabata plat.
Sindicato SEPPA ta para 100 porciento tras di e lucha di trahadornan, y nan a mustra cu tanten cu gerencia no duna un contesta, nan lo no drenta bek y bay traha.
Post Aruba NV pa colmo falta trahador pa e servicio di Bestel Dienst. Y gerencia ta keha tambe cu a perde 30% di cobranzanan cu tabata wordo manda antes pa Setar NV. Pero aki ta unda cu e trahadornan ta spera cu gerencia lo bin cu inovacion y busca forma pa crea entrada nobo. Den diez aña, nan no ta mira nada di esey ta socede.
E trahadornan ta mira cu hopi hefe y miembro di gerencia ta atende Conferencianan Mundial, pero na final no ta mira ningun inovacion, cambio, y progreso. Cada biaha ta menciona cu tin plan riba mesa, pero trahadornan mes no sa nada di esey.
Mediador di Gobierno a drenta den e asunto, y e trahadornan ta spera cu gerencia awor si lo por yama nan y ta cla pa duna contesta.
