Na entrada di temporada halto di turismo bon noticia revela
*Menos riesgo den un caos di balor monetario mundial actual
*Parti grandi di mundo ta considera 2023 como aña perdi
ORANJESTAD (AAN)- Cada dia cu pasa ta un reto nobo pa mundo, cu ta den problema sumamente serio.
E aumento di pobresa na paisnan grandi a pesar di medidanan pisa cu nan ta tuma, ta alarmante.
Pobresa ta nifica dolor humano, cu ta multipla su mes dor di e hecho cu e pober no tin placa pa gasta y asina no por sostene economia, cu di su parti no por crea trabou y entrada pa e pober.
Inflacion den e situacion mundial ta sigui su curso hunto cu incertidumbrenan grandi causa pa dramanan economico historico, cu mundo no a spera na final di 2022 y entrada di 2023, cu a wordo planea originalmente como recuperacion mundial.
Bista di DIARIO ta keda dirigi riba e realidad pa Aruba, cu ta depende di cantidad di factor internacional.
Aruba ta depende di turismo y actualmente uno di e problemanan mas grandi cu turismo ta enfrenta, ta incertidumbre y mas incertidumbre ya cu prijsnan ta sigui subi y e situacion mundial ta keda caotico y dificil pa pronosticonan.
Kico Aruba por spera di temporada di turismo?
Hunto cu informantenan experto local y internacional, DIARIO a discuti e posibilidadnan pa Aruba na salida di 2022 y entrada 2023, cu ta marca e temporada turistico di Aruba.
Aruba historicamente a wordo bende como e destinacion di solo, beach y alegria.
Na e momentonan aki loke ta uno di e motibonan grandi pa turistanan Mericano dicidi pa Aruba, ta e relacion monetario entre Dollar y Florin, cu ta nifica trankilidad monetario.
E problema grandi pa atrae biaheronan na 2022, ta e forma cu e balornan di moneda den nan relacion cu otro, ta subi y baha.
Europa ta mira su moneda bay suela atrobe. Instabilidad monetario ta marca cantidad di pais debi na nan relacion cu otro a base di nan moneda.
Aruba ta mara monetariamente na e moneda di su mercado turistico mas grandi cu ta Merca.
E Florin y Dollar ta subi y baha cu otro loke ta nifica cu e turista Mericano no por wordo sorprende cu cambio di placa por haci cu e ta keda cu menos placa den su cartera pa e gasta, cu el a spera.
Informantenan a indica cu durante e temporada 2022 pa 2023, e decision di pasado pa e Florin Arubano ta mara na e Dollar Mericano ta brinda siguridad na e turista Mericano y ta bira otro punto di atraccion y preferencia pa Aruba den e temporada turistico sumamente importante.
Na hopi pais e miedo di instabilidad monetario ta stroba turismo cu ta wordo afecta tambe pa e aumento barbaro di prijsnan.
“Aruba mester sostene e posibilidad grandi aki pa su crecemento turistico hasta den e peligro di recesion mundial. E turista kier biaha y ta baha tur su riesgonan den un mundo dificil. E hecho cu Florin ta mara na Dollar ta importante ya cu e ta stabilidad den tanto instabilidad mundial,” informantenan a indica.
Palabra ta awor na tur sector pa coopera den e lunanan na caminda pa 2023, cu Aruba por comberti den un temporada fructifero nacional.
