Minister Wendrick Cicilia contento cu
ORANJESTAD (AAN): Cu e gran mayoria di e trahadonan di Secrets Baby Beach Aruba ta di pariba di brug, ta yena e Minister di Turismo y Labor cu masha orguyo. “Porfin pariba di brug ta haya oportunidad pa progresa”, e mandatario a sigura. Di e 430 empleadonan trahando eynan, e gran mayoria ta local y di esey mas o menos 90% ta di pariba di brug. Cu esey a drecha calidad di bida di un cantidad di ciudadano cu porfin por traha cerca di cas.
Minister mr. Wendrick Cicilia a bishita e proyecto di Secrets Baby Beach Aruba, pa cera conoci cu e avansenan y preparacion pa apertura otro siman. E gerencia a sigura e mandatario cu a dedica hopi atencion y a duna prioridad na recurso humano, na empodera e trahadonan y brinda oportunidad pa por sigui studia y crece den e compania. Ya a manda varios di nan na otro paisnan pa cera conoci di cerca cu e operacion di Secrets. Nan a pasa door di e proceso di “train the trainer” y awendia ta yuda guia e empleadonan nobo cu a join e famia di Secrets.
“Mi a keda contento di topa hopi conoci y amigonan di pariba di brug trahando eynan. Awo nos hendenan tin e opcion pa traha cerca di cas”, Minister Cicilia a duna di conoce durante e recorido. El a keda mas contento di scucha e plannan di e hotel pa inverti mas ainda den recurso humano y den desaroyo di nan empleadonan.
“Cu mi pechi di Minister di Labor, mi gusta tende di paz laboral y oportunidad di progreso pa trahadonan. Mas hende na pia di trabou, ta mas local contento cu tin pan riba mesa y cla pa hiba nan mes, nan famia y Aruba padilanti”, e mandatario a enfatisa.
Secrets Baby Beach Aruba ta habri cu como 430 empleado y a garantisa un pakete di beneficionan cu a atrae mayoria di pariba di brug pa acepta e “deal” mesora. E minister a finalisa bisando cu “porfin pariba di brug a haya un bon chens!”
