Monumentenfonds tambe a participa na conferencia
ORANJESTAD (AAN): E ultimo dianan a tuma lugar na Bonaire e di tres leer-en netwerkconferentie di Dutch Caribbean Heritage Platform, cual ta forma pa diferente organizacion di e diferente islanan di Reino cu ta traha den e area di herencia cultural.
E tema tabata “Uzo sostenible y mantencion di herencia cultural den e parti di Caribe Hulandes. Un programa varia cu aproximadamente cincuenta participante na Bonaire y binti participante online a yuda pa fortalece e lasonan entre e islanan. E conferencia a keda clausura diabierna cu e firmamento di una declaracion di intencion den cual a haci acuerdonan pa futuro.
E conferencia a cuminsa cu un mensahe di video di Professor mr. Pieter van Vollenhoven. E ta e embahador di e plataforma na Hulanda y a apoya y yuda e plataforma for di su inicio na 2014. E primer dos dianan, diaranson y diahuebs, nos a haya curso den e formato di ErfgoedAcademie na Hulanda. E formato Hulandes a inclui tambe expertonan local y tabata dirigi riba traha hunto pa yega na solucionnan sostenibel pa problemanan actual y comparti conocemento y experticio.
Riba diaranson y diahuebs a tene lecturanan na Marriott Courtyard y Delfins Resort pero tambe a haci algun excursion na Rincon, Karpata y Guatemala.
For di diferente perspectiva a wak e posibilidadnan pa preserva e herencia cultural di e islanan lo mihor posibel. A siña tocante e mantencion di monumentonan tanto di e parti tecnico como planificacion di mantencion. Tambe e participantenan a siña tocante restauracion y con pa duna un vida nobo na monumentonan pa medio di redestinacion.
E grupo a bin cu plannan concreto y conseho pa doñonan, habitantenan y administradornan di e edificio y areanan cu a keda trata. Riba diahuebs atardi a organiza e conferencia den combinacion cu e simposio tocante “vastgoed” di e oficina di abogado VanEps Kunneman, VanDoorne. Asina representantenan di e sector di “vastgoed” a crea un laso mas estrecho cu esnan di e sector di herencia cultural. E tema e día aki tabata “waardevolle keuzes”.
Diabierna a habri e mainta cu un mensahe di video di e Staatsecretaris di Cultuur & Media di Hulanda, señora dr. Gunay Uslu. el a inspira nos pa sigui cu e trabaonan di e plataforma. Despues di esey a sigui cu presentacionnan tocante beleid, financiamiento y posible desaroyonan di herencia cultural na e islanan. A pone tur locual a siña y e plannan pa futuro den un intentieverklaring.
Esaki ta regla den liñanan grandi con e plataforma lo sigui desaroya. Banda di esaki ta indica tambe te con leu lo traha hunto na intercambio di informacion entre e islanan y nan necesidadnan.
Nan kier gradeci tur esnan cu a participa fisicamente y online, tur e oradornan, e team di ErfgoedAcademie, tur organizacionnan cu a yuda na ehecuccion di e programa, manera Fundacion Cocari y Fundacion Krusada, tur persona cu a traha tras di cortina y Bonaire pa su hospitalidad como anfitrion. E conferencia aki no lo tabata posibel sin e subsidio cu nos a ricibi di Rijksdienst van het Cultureel Erfgoed y Nationaal Restauratiefonds y e colaboracion di ErfgoedAcademie y Fundacion Cocari.
Nan ta mirando e futuro cu confianza y lo sigui traha hunto na un mihor preservacion di nos pasado comparti.
