Premier Wever-Croes:
ORANJESTAD (AAN): Relaciona cu e detencion di Glenbert Croes, Minister President, Evelyn Wever-Croes a duna un declaracion na su yegada na Aruba.
El a bisa cu esaki ta un noticia cu ta dal duro den un gobierno. El a confirma cu Glenbert Croes a entrega su retiro como minister, esey a base di ley y a base di palabracionnan cu tin den Partido MEP y gobierno, cu ora c'un minister bira un sospechoso cu e ta entrega su retiro.
Aworaki tur cos ta den man di Ministerio Publico. Gobierno ta demisionario pa algun siman y tin palabracionnan kico ta e casonan cu por atende y esey lo continua te ora cu tin un minister nobo, a bisa.
Den caso di Glenbert Croes, e mes a entrega su retiro. Gabinete Wever-Croes a acepta esaki y ta bay reparti e trabao cu ta keda pa e resto di e periodo entre e ministernan cu tin.
Wever-Croes a laga sa cu e lo reuni cu e ministernan prome pa delibera si ta un minister of mas minister. Ya caba tabatin Conseho di Minister den forma virtual, pero na e momento ey tabata wardando riba e carta di retiro di Minister Croes.
E ta sigura cu e maneho di Croes lo continua y lo informa ken ta esun encarga cu ne.
E mandatario a enfatisa cu esaki ta un sla duro pa Partido MEP cu semper a para pa integridad. Pero kiebro di integridad tin su consecuencianan pa ken cu ta cu ta figura riba lista y sin importa con cerca e persona aki por ta.
Den e caso aki tin cu duna espacio pa husticia haci su trabao. Glenbert Croes a entrega su retiro pa asina duna espacio pa e investigacion por tuma luga sin interferencia.
"Ami semper ta kere den inocencia di un persona te ora cu wordo prueba lo contrario. Mi ta un hurista y esey ta e principionan di e puntonan di salida di nos sistema", a expresa.
Relaciona cu e pregunta riba 'timing' mirando cu tin eleccion dia 6 di december, Wever-Croes a indica cu Ministerio Publico ta completamente independiente pa nan investigacionnan. E tema di 'timing' ta un asunto di Ministerio Publico.
Como ehempel, a bisa, na 2021 cu tabatin eleccion, un siman prome cu eleccion, Marisol Tromp a bira sospechoso den un caso di corupcion hunto cu e director di DIP. Pero Ministerio Publico a dicidi cu no ta publica nada y cu no ta bay informa comunidad di nada hustamente pa no interferi cu eleccion cu tabata un siman despues.
Aworaki PG a indica cu OM tin su maneho nobo y pa loke ta 'timing' unicamente Ministerio Publico por bisa algo riba esey, Wever-Croes a declara. "Esaki ta e prome minister activo di nos gabinete cu ta bira un sospechoso. Den otro casonan tabata ex minister of ex integrantenan cu a bira sospechoso y esey ta full un otro situacion, a remarca.
