'Tourism Security Patrol' ta e comienso pa eleva siguridad den e area hotelero  

Minister Rocco Tjon:

ORANJESTAD (AAN): Dialuna mainta, durante un conferencia di prensa, Minister di Husticia y Asuntonan Social sr. Rocco Tjon conhuntamente cu e miembronan di directiva di Aruba Hospitality & Security Foundation (AH&SF) a lansa oficialmente e Tourism Security Patrol Aruba.

            Un proyecto cu un trayectoria largo, pero cu awe ta un realidad. Esaki ta e comienso pa eleva siguridad den e area hotelero pa comunidad y nos bishitantenan.

            E ekipo di Tourism Security Patrol Aruba ta consisti di 15 persona cu a sigui varios training riguroso na diferente companianan di siguridad como tambe na Cuerpo Policial mes. Cada un lo ta ekipa cu material pa traha raport, bodycam, flashlight, electrical bicycle y mas.

            Segun estadisticanan di ATA, 98% di bishitante a indica cu un di e motibonan principal pa bishita Aruba ta pa motibo di siguridad. Pa Ministerio di Husticia y Asuntonan Social, esaki ta un momento sumamente importante, pasobra e proyecto aki ta e muestra cu nos ta sigui inova e manera con ta bay garantisa siguridad na Aruba.

            Diaranson awo, lo reuni cu e business community pa asina por ehecuta e proyecto aki den centro di ciudad na Oranjestad y despues na San Nicolas.

            Un danki y un pabien na AH&SF, ATA, KPA y tur cu a haci e proyecto aki exitoso.