ORANJESTAD (AAN): Diadomingo atardi na altura di Grapefield, algun guia di tour tabata testigo di un accidente fatal cu un UTV
cu no tabata tin un number legal V. Representantenan di Tour Operators Uni ta lamenta e sucedido fatal aki cu a cobra bida di un hoben Hulandes. Pues, cu apenas algun siman hibando conversacion tocante e importancia pa regula y haci debido control di e vehiculonan aki, awo por mira e consecuencia grave cu esaki por trece cu ne.
Segun informacion disponibel, e accidente no tabata relaciona cu un tour organisa, pues, un tour organisa semper tin un guia licencia cu un grupo, vehiculo registra y ta core riba rutanan conoci. Ademas, coleganan na e sitio a indica cu e conductor di UTV lo a trata di haci algun maniobra cu e UTV resultando den un accidente fatal. “Velocidad halto, ‘drifting’ of ‘donut’ cu tur tipo di vehiculo specialmente UTV ta cosnan cu nos ta condena tambe y ta p’e motibo aki nos ta urgi control den nos sector”, asina representantenan di Tour Operator Uni a informa.
E topico di UTV/ATV pirata cu ta opera ilegal y core den costa panord cu plach’i number A tambe ta un aspecto cu pa hopi tempo a purba haya oido riba dje. Segun Tour Operators Uni e fase di dialogo actual ta esencial pa evita e tipo di accidentenan aki y na mes momento ta enfatisa cu banda di dialogo, e sector mester di accion urgente di parti tur stakeholder concerni.
Mientras tanto, Tour Operators Uni ta keda na disposicion di autoridadnan cu cualkier informacion cu por yuda den e investigacion. Den nomber di operadornan local y tambe guianan, Tour Operators Uni ta manda palabra di condolencia na famia y conocirnan di e victima.
