ORANJESTAD (AAN): Como parti di su mision comercial na Santo Domingo durante HUB Camara Santo Domingo 2026,
Minister di Finansa, Asuntonan Economico y Sector Primario, Geoffrey Wever, a bishita Suplidora de Carnes A&B pa explora con e compania por desaroya un relacion comercial mas structural cu mercado Arubano.
Suplidora de Carnes A&B ya ta USDA-approved y permiti pa exporta pa Aruba. E enfoke di e reunion, consecuentemente, no tabata riba acceso na mercado, pero riba e condicionnan cu mester ta presente pa logra entreganan real.
“E porta ya ta habri. Awo nos mester concentra riba loke ta haci comercio funciona den practica: producto, volumen, prijs, logistica y continuidad di entrega,” Minister Wever a indica.
Durante e bishita, Minister Wever a haya informacion tocante e surtido, capacidad di distribucion, mercado di exportacion y red logistico di e compania.
Pa producto di carni refrigera y congela, frecuencia di transporte, consolidacion di carga y confiabilidad di entrega. E factornan aki ta esencial pa sigura calidad y, na mes momento, mantene importacion comercialmente atractivo pa un mercado relativamente chikito manera Aruba.
E conversacion a trata tambe e obstaculonan cu por limita exportacion mas regular, incluyendo volumen, costo logistico y necesidad pa coordina mihor entre exportador, importadornan, autoridadnan y operador logistico.
Pa Minister Wever, e siguiente paso mester ta acercamento directo entre Suplidora de Carnes A&B y importadornan y distribuidornan Arubano interesa.
“Gobierno su rol ta facilita acceso y crea e conexion. Prijs, volumen, specificacion di producto y contractonan ta responsabilidad di sector priva. Nos tarea ta yuda pone e condicionnan pa desaroya e oportunidad,” Minister Wever a enfatisa.
E meta ta pa determina si e capacidad existente di Suplidora de Carnes A&B por wordo conecta cu demanda Arubano den un modelo cu ta confiabel, competitivo y sostenibel.
E siguiente fase ta pa e compania y importadornan Arubano interesa sigui explora oferta di producto, volumen, prijs, consolidacion, frecuencia di transporte y condicionnan comercial.
Ministerio di Finansa, Asuntonan Economico y Sector Primario lo sigui facilita e contactonan necesario y duna seguimiento na e oportunidadnan cu ta sali for di HUB Camara Santo Domingo 2026.
