Total di 104 cursista a finalisa exitosamente e curso ‘Biba Amor’

ORANJESTAD (AAN): Recientemente a tuma luga entrega di certificado na 104 cursista cu a finalisa e curso di educacion sexual Biba Amor exitosamente.

Na september 2023, Dienst Publieke Scholen (DPS) a introduci e programa di educacion sexual Biba Amor na e klasnan 5 y 6 di scol basico.  Ministro Endy Croes tabata presente na e entrega.

   E meta di Biba Amor ta pa crea concientisacion, baha e cifra di embaraso hubenil y stimula nos hobennan pa haci escogencia sano. E lesnan a trata diferente topico entre otro, norma y balor, conoce bo mes y contacto cu mayor.

   Tambe a pone hopi enfasis riba e aspecto social, emocional y bienestar en general di e hoben. DPS a ofrece e dianan di capacitacion na maestro, maestro di movecion y salud, cabesante, IB’ers y SMW’ers y a organiza diferente ronda di informacion pa mayor.

   E training y programa a ser facilita door di Señora BSc. Pharetza Berdat-Damon cu cooperacion di Ministerio di Salud, Ambiente y Naturalesa di Curaçao. E proyecto a conta cu cooperacion estrecho di Wit Gele Kruis Aruba Departamento di Tienermoeder, encabesa pa Señora Monique Giel-Labad. Minister Endy Croes tabata presente na e ceremonia, unda el a hiba palabra y a felicita e 104 cursistanan.

   Señora Pharetza Berdat-Damon a indica cu den nomber di Ministerio di Salud, Ambiente y Naturalesa di Curaçao tabata un placer di por a duna un aporte na e educacion saludabel di e hobennan na Aruba, unda cu a brinda informacion alcaso pa asina nan mes por tuma un decision cu ta aporta na nan desaroyo sexual saludabel.

   Por ultimo, e mandatario di Enseñansa y Deporte ta gradici Señora Pharetza Berdat-Damon, ekipo di DPS esta, Señora Morela Dirkz, Señora Marylou, Señora Richenella Croes- Wever, Sr. Johnny Tromp y Sr. Junny Oleana cu a haci e proyecto aki posibel y exitoso.