MARIGOT: Gobierno di e isla di St. Martin frances a tuma decision! E cantidad di casonan activo di Covid-19 ta subiendo na tanto St. Martin y tambe St. Barths,
y pesey a implementa un biaha mas pa escala medidanan riba tur dos isla, como cu e casonan a redobla den diez dia.
E Préfet Serge Gouteyron di St. Martin a anuncia cu Toque de Queda a bin bek, y e meta di esaki ta pa mitiga e brote di e virus door di limita movimento y encuentronan. Toque de Queda lo start pa 10:00 pm y ta finaliza pa 5:00 am.
Nan a haci esaki pa un periodo di dos siman, pues e lo finaliza dia 20 di Augustus 2021.
Bo mag di sali riba caya solamente si ta un emergencia di salud, pa trabao, of pa asisti hendenan vulnerable. Tambe bo por ta riba caya si acaso bo ta hibando of buscando hende di Aeropuerto.
Hospital na St. Martin frances ta mustra cu tin 13 pashent na Hospital, di cual uno ta riba un ventilador. Dos pashent di Covid-19 a fayece den ultimo dos siman, y asina e isla a yega na 40 morto desde cu e pandemia a cuminza.
Demas islanan Frances den Caribe, ta raportando cu e situacion di salud ta deteriorando, e.o. Guadeloupe y Martinique den ultimo simannan. Normalmente ora cu e Hospital di St. Martin frances mester di extra yudanza, tabata manda pashent pa sea Guadeloupe of Martinique. Pero awor cu e otro islanan tambe tin Hospital yen, esey ta haci e sistema uno preocupante pa autoridadnan di salud na St. Martin.
