TOPA cumpliendo e meta di prepara su delegadonan pa defende nan mes na pia di trabao

Vilma Theijsen, Secretario Formacion TOPA:

*Pero tambe pa sinta den dialogo

ORANJESTAD (AAN)—Señora Vilma Theijsen, Secretaria di Formacion- Educacion di Sindicato TOPA (Trahadornan Organiza Sector Publico Aruba), den entrevista cu DIARIO a menciona, cu desde cu el a drenta, na aña 2022, TOPA a cuminza forma su delegadonan.

Actualmente, nan tin un directiva completamente nobo y tin varios cambio dentro di e directiva tambe, di parti di e delegadonan. Nan tin varios delegado nobo, cu ta presente aworaki.

“Nos kier pa nos delegadonan haya un bon formacion, unda cu nan por defende nan mes na pia di trabao, pero tambe ora nan ta sinta den dialogo.

Tur esaki ta e meta pa prepara nos delegadonan y, pa bisa berdad, den nos statuto tambe ta haciendo cambionan grandi, unda nos ta tene cuenta cu e BW cu tambe a cambia, y tur esey ta partinan di e ley”, señora Theijsen a bisa.

TOPA tambe ta preparando e parti laboral digitaliza pa e hobennan, y p’esey e ta gradici cu Adrie Williams a bin cu su yiu, cu ta e parti di hubentud, pasobra no ta dia aworaki sino for di añanan y no solamente Aruba, pero internacionalmente, tin e problema pa inclui hubentud.

“Mi no por bisa si nan ta interesa of no, pero nos tin cu wak tambe con pa hala nan acerca, pa e parti ey unda nan ta prepara nan mes pa e parti sindical”, Vilma Theijsen a señala.

El comenta cu nan a cuminza na Maart tambe cu señor Dave Martinez, cu e parti di liderazgo, y awo nan ta cu Adrie den e parti sindical y e cambionan concerni.