Tin urgencia pa un strategia nobo pa un economia duradero y inclusivo
ORANJESTAD (AAN): Desde 1986 cu Aruba a haya su Status Aparte, nos a tuma e decision pa desaroya e industria di turismo como pilar di nos economia. Parti di esaki tawata e construccion di hotelnan pa asina e turista por a bin disfruta di nos solo y beachnan. Construccion di hotelnan a pone e economia di Aruba crece considerabelmente y a trece prosperidad economico pa nos isla.
Pa duna servicio den e hotelnan, banda di nos mesun hendenan mester a busca hende di afor pa yuda den esaki. Populacion di Aruba a crece loke a pone un presion grandi riba infrastructura, medio ambiente y servicionan basico manera cuido medico, educacion, pensioen, seguridad, awa y coriente.
Como orador invita na e Business Networking Event organisa door di Comerciante Uni Aruba, Minister Geoffrey Wever a pone enfasis cu no por sigui tuma e mesun decisionan di pasado si nos sa di awor caba kico e impacto ta riba e calidad di bida di nos proprio habitantenan y den futuro. E manera di sigui crece den cantidad di cambernan den turismo no ta duradero y no ta tene cuenta cu Aruba ta un isla chikito y cu poco espacio disponibel.
Pa midi si nos economia a crece ta uza e indicador Producto Interno Bruto. E Producto Interno Bruto por ta den balor nominal o balor real. Ora ta papia di balor nominal, esaki ta den prijsnan di awe of di e periodo menciona. Balor real ta nifica cu ta kita e efecto di aumento di prijsnan di productonan y ta wordo uza como indicador pa calidad averahe di bida di un pais. Informacion publica over di nos economia ta mustra cu e manera pa sigui stimula economia di Aruba, traha mas hotel y condominio no ta loke ta beneficia henter nos pais.
Den 2019 e economia di Aruba tawata 8,3 biaha mas grandi cu e economia den 1986 midi den balor nominal. Pero si nos wak e balor nominal di e economia parti over di tur habitante, Producto Interno Bruto per capita, esaki tawata 4,5 biaha mas grandi cu den 1986. Esaki ta menos cu e crecemento di e economia. Pa loke ta trata e balor real di e economia, of e calidad averahe di bida, esaki den 2019 esaki tawata 2,5 biaha mas grandi cu 1986 dus un diferencia grandi. Esaki ta mustra cu aunke e economia di Aruba a crece, e calidad averahe di bida di nos habitantenan a keda hopi atras. Desde 2000 e desaroyo di e Producto interno Bruto per capita real of calidad averahe di bida ta stagna.
Mirando e necesidad y urgencia pa un modelo economico duradero, minister Geoffrey Wever a informa cu a traha un 'National Action Plan 2023-2025 Aruba's Transition To A Sustainable And Inclusive Economic Model' y cu esaki recientemente a wordo aproba door di conseho di minister y cu minister Wever lo presenta na Parlamento 30 di maart y despues pa pueblo. Un plan cu ta pone un base concreto pa diversifica e economia den uno duradero y inclusivo. Ta importante pa hiba e debate cu no por sigui desaroya nos economia na e mesun manera cu a haci e ultimo 32 añanan si cifranan oficial ta demostra cu e calidad di bida di nos ciudadanonan ta wordo negativamente afecta.
Minister Geoffrey Wever ta gradici Comerciante Uni Aruba pa e invitacion como key note speaker durante nan Business Networking Event, un evento exitoso riba 22 di maart 2023.
