Test importante lo worde haci na planta di RECIP-IV
ORANJESTAD (AAN): Como un compania responsable, gerencia di WEB Aruba NV a dicidi na adelanta y duna pueblo informacion di antemano, riba un situacion cu lo bay socede awe Diabierna den oranan di mainta.
Segun WEB Aruba NV, como parti di proyecto RECIP IV, awe Diabierna 24 di maart 2023 entre 8:00 am pa 10:00 am lo tuma lugar varios test den planta di generacion di coriente.
E compania a splica, cu e testnan aki ta necesario pa por confirma cu e planta nobo ta funciona debidamente.
Pero toch, mirando e magnitud y riesgonan envolvi cu e trabao, ta keda existi un posibilidad minimo cu por surgi interupcion di coriente. E grupo di proyecto RECIP IV, hunto cu coleganan di diferente departamento na WEB en cooperacion cu partner Wärtsilä, lo tuma tur precaucion y coordina e trabao di tal forma pa evita cualkier incidente of interupcion di coriente.
