Shurman Milliard - Trahador Social 131
ORANJESTAD (AAN): Trahador social di 131, Shurman Milliard a elabora den un entrevista cu DIARIO, cu 131 tabata druk presentando diferente charla na nos hobennan, incluyendo e parti di salud mental.
Durante e charlanan aki, 131 a tuma nota cu nan a wak un falta di conocemento general entre hobennan di 18-21 aña, cu no tin idea riba asuntonan manera paga un hipoteca, cuentanan, con cierto instancianan ta traha.
Nan a ripara cu hopi mayor of otro adultonan no ta papia cu nan yiunan tocante hipoteca, siña e hobennan cushina, pago di cuentanan, kico ta encera haya un yiu, costonan di bida. E tradicion di sinta na mesa come y combersa riba temanan di tur dia no tey mas. Milliard a indica cu e falta di e tradicion aki, ta stroba desaroyo di e mucha y ora nan ta bay studia of biba den exterior, nan ta haya nan mes confronta cu ne y no sa kico mester haci, cu ta bira un presion mas mientras nan mester atende cu scol y bida social.
131 ta trece dilanti den nan charlanan, diferente tema cu e hobennan aki mester pensa mas riba dje, por ehempel, hopi no sa na unda nan ta para como un hoben di 18 pa 21 aña, kico nan kier den futuro, paisnan cu nan kier bishita y pakico. No pasobra un amigo di bo kier bishita un pais cu bo mester haci mescos. Kico bo kier siña? Cua cultura bo ta identifica cu ne, y con tur esaki por influencia bo desaroyo profesional y adulto.
Segun Milliard, 131 tambe ta experencia hopi parti positivo tambe, manera di e 400 hoben cu ta bay studia afo, entre 300 pa 350 ta bay cana e caminda corecto ya cu nan a haya diferente guia. Por ta di e 400 hoben, 50 tin duda, 30 mester di mas yudansa y 20 por a cay den mal caminda. El a enfatisa cu ta importante pa celebra e 350 hoben cu a haci nan best y bin bek Aruba pa enrikece nos comunidad.
Milliard a bisa cu nan no lo laga atras e 20 cu mester di mas ayudo, y lo sigui duna nan tur sosten necesario.
