Parlamentario Shailiny Tromp-Lee:
ORANJESTAD (AAN): Den e programa di INTERES DI PUEBLO di diasabra ultimo, Parlamentario Shailiny Tromp-Lee a comparti varios informacion importante pa pueblo di Aruba.
Parlamentario Tromp-Lee tabata tin e honor di fungi como Presidente pa Parlamento pa un dia. Esaki debi cu dia 8 di januari 2025, e tabata e unico legalmente autorisa pa fungi como tal, mirando cu dia 10 di september ultimo el a wordo eligi como Vice Presidente di Parlamento, y tin e autoridad ey te ora un presidente nobo wordo eligi. E eleccion aki a tuma luga dia 8 di januari, y entrante dia 9 di januari, Parlamento di Aruba a haya un presidente nobo, den persona di señora Gerlien Croes.
Desde e stoel di president, Parlamentario Tromp-Lee por a mira hopi, el a comenta den e programa radial. E por a mira desaroyo interesante y relacion entre coleganan. El a señala cu ta hopi importante pa na momento di forma un gobierno, pa scoge personanan como mandatario cu por traha bon hunto, cu tin un grado halto di tolerancia pa cu otro, pasobra bo mester por traha den un ekipo. Principalmente mester ta hendenan madura cu por maneha e pais, y no mester pensa primeramente riba bienestar di e persona of di e partido, pero di nos pais.
Mientras tanto, algo cu tin algun hende confundi, ta bon pa enfatisa cu nos tin un gobierno awor, Gabinete Wever-Croes 2 bou di liderazgo di Evelyn Wever-Croes. Parlamentario Shailiny Tromp-Lee a trece padilanti cu ta importante pa e gobierno wordo forma lihe si pasobra tin algun ley importante pendiente den bienestar di nos pueblo. Mas lihe nos tin un gobierno, mas lihe e trabounan por continua.
“Mientras tanto tur 21 parlamentario mester realisa cu trabou di Parlamento no mester warda, parlamentarionan no mester bira pasivo, pero mester traha pa genera e bienestar di nos pueblo”, segun Parlamentario Tromp-Lee.
E Parlamentario a menciona entre otro e ley pa crea un salario minimo husto, “minimum uur loon”, un ley cu ta cla, y cu a cana su proceso completo caba. E ley aki ta cla pa wordo yama y ser trata, y e ta spera cu e ley por wordo aproba pronto.
Tambe Parlamentario Tromp-Lee a menciona e Presupuesto 2025. Esaki tambe ta practicamente cla pa wordo trata, ta falta solamente e contestanan di gobierno, y e por wordo trata. Ta importante pa e ley aki wordo trata, pasobra varios hefe di departamento ta acerca e Parlamentario pa trata e presupuesto. Pasobra sino e ta tranca proyectonan di inversion cu e diferente departamentonan ta pendiente di dje, y e ta tranca e maneho di nos pais.
A traves di e programa radial diasabra mainta, INTERES DI PUEBLO, politiconan lo sigui duna informacion riba topiconan di relevancia.
