Violacion di regla basico di cushinamento
ORANJESTAD (AAN): Siman pasa un señorita a pasa na un Restaurant local situa na Playa, y a haci pedido di un ‘Mixed Ceviche’ pa e bay cas cune. El a pensa cu Mixed Ceviche lo a bin cu diferente tipo di cuminda di lama den dje. El a keda desapunta cu su ‘Mixed Ceviche’ a consisti di 20 bloki chikito di pisca, y 1 solo cabaron.
El a saca un potret y a pone riba social media. Y publico cu a mira e potret aki a spanta di loke por mira! Esey ta cu e Ceviche a wordo poni den foil di aluminio.
Varios persona a mustra riba e peligro di pone algo tempera den lamunchi y binager den foil. “Ta shiwata mes nan kier shiwatabo,” tabata comentario di un persona.
Algun hende hasta a considera esaki como ‘intento di asesinato’ di pone cuminda tempera di lama den foil.
Hecho ta cu esaki ta un Restaurant cu ta existi pa basta aña caba, y ta incomprendibel cu esnan den food preparation no sa di e peligro aki. Hamas pone Ceviche (y cualkier cuminda di lama tempera) den papel di foil di aluminio, of baki di aluminio! Pasobra e liquido acido ta cuminza “desintegra” e aluminio.
Historia di Ceviche: Ceviche ta un cuminda cu tin su origen di paisnan na costa di Sur America cu Oceano Pacifico, y awendia e ta wordo goza rond mundo. E plato aki cu a origina na Latino America, ta mucho mas cu djis un preparacion culinario, e ta un experiencia cu ta pone comedornan sinti e diversidad cultural di e lugarnan di origen.
Ceviche tin su raiz den civilizacionnan antiguo, unda tabata usa metodonan pa tempera pisca cu juice di frutana acido. E acido di e juicenan aki, cu ta funciona di forma similar cu binager, tin e capacidad di cushina livianamente e pisca curu, dunando e comedor un plato fresco y delicioso. Historia a mustra cu e tecnica aki tabata wordo usa den regionnan di costa di Peru, Ecuador, y Mexico hopi prome cu e colonizadornan Europeo a yega.
Atravez di tempo, ceviche a evoluciona y a adapta na diferente cultura y tradicion culinario di Latino America. Cada pais, y hasta cada region, a aporta nan mesun adaptacion di crea ceviche, y asina awendia tin un variedad amplio di receta y forma cu e ta wordo presenta. Bo mester corda semper, cu ora nan sirbi Ceviche, e ta un plato cu bo tin di come mesora.
Hecho ta cu un ceviche traha cu combinacion di juice di lamunchi y binager blanco ta crea un equilibio perfecto di acidez cu ta resalta asina e frescura di e pisca y e ingredientenan. Pa 500 gram di pisca fresco corta den bloki, bo tin di usa 1 cup di juice fresco di lamunchi, y 2 cuchara di binager blanco.
Peligro di foil y lamunchi: Sinembargo esnan cu a bay Scol Culinario, of a siña por lo menos lesnan Basico di Koki, sa for di cabez cu hamas bo por pone juice di lamunchi of binager den baki di aluminio, of papel di foil di aluminio.
Tur loke bo tempera sea den lamunchi of binager blanco, pues worst tempera, webo tempera, pisca tempera, y esey ta inclui ceviche, ta algo cu ta wordo preserva den un liquido di salo y acido (normalmente binager).
Pakico no por pone nan den baki di foil? Pasobra solucionnan di salo y acidico lo bay disolve metalnan comun (specialmente si tin oxigeno). Esaki por pone bo baki di aluminio of foil di aluminium haya buraco y ta agrega un sabor desagradabel di aluminio (y kizas un dosis toxico di e metal) na bo ingredientenan tempera.
Si bo pone ceviche den baki di oro, of platinum, of otro metal cu no ta reactivo, esaki lo no ta problema.
Bobo y peligroso: E persona na e restaurant na Playa cu a hinca e Ceviche den un baki di cuminda, y a pone foil di aluminio paden di dje pa evita cu e liquido di lamunchi y binager basha afo... aparentemente no sa nada basico di peligro ora di prepara cuminda. E ta un persona cu kizas nunca a wordo educa riba e asunto aki, of net e dia cu el a bay scol y cu a papia riba esaki, e lo a spijbel of tabata ausente.
Pasobra e por a pone e clientenan cu a paga pa e Mixed Ceviche aki bira malo. Debi cu particulanan microscopico di aluminio por ta peligroso di bo come un cantidad grandi di e aluminio aki. Investigacion a determina cu consumo di aluminio por ta liga cu problemanan di salud manera malesa di Alzheimer, Osteoporosis, y tambe fayo di Riñon.
DIARIO ta publica esaki, cu e speranza cu mas trahador cu ta labora tur dia den un Cushina na Aruba, ta na altura di cierto productonan cu bo no mag di combina. E ta algo cu managernan y directornan di Restaurant tin di busca forma pa duna empleadonan curso di HACCP pa asina siña tur chef, koki, sous chef, line cook, y demas personal den cushina riba reglanan basico pa cuida salud di clientenan.
