Señora Nathy Franco Ventura di CCC:
ORANJESTAD (AAN): Hopi doño di mascota, pa un motibo of otro, dado momento ta dicidi cu nan kier deshaci di nan mascota. Hopi biaha, nan ta haci esaki di formanan hopi inhumano sin tene cuenta cu e bienestar di e bestia cu un dia nan a busca sea pa compania, cuida cas of haci nan yiunan contento.
Señora Nathy Franco Ventura di Centro di Control di Cacho, den un combersacion recien cu DIARO, a duna di conoce cu abuso di mascota ta continua na Aruba. Entre otro, tin hende cu ta djies tira nan mascota dilanti di e centro, apesar cu esaki ta contra ley pa haci riba tereno priva. Y tur fundacion, incluyendo CCC, tin hopi trabou y responsabilidad y esakinan ta bin acerca.
Señora Franco Ventura ta pidi ciudadanonan doño di mascota, pa tuma nan responsabilidad manera cu mester ta. Si no por mantene of no ta desea e mascota mas, pa busca un solucion mas humano, entre otro contacta fundacionnan pa yuda cu entre otro sterilisa e mascotanan, cu remedi di carpata of pa cuminda temporal si esey ta e necesidad. Tambe por busca un hogar y famia nobo pa nan mascota riba medianan social.
Locual si no por sigui, segun señora Franco Ventura, ta e ‘dumping’ unda cu ta di mascotanan indesea. Esaki ta causa cu hopi cacho y pushi ta wordo malamente ataca door di otro mascotanan. “Esaki ta consecuencia di actonan iresponsabel di doñonan. Mientras cu tin solucion mas humano”, segun señora Franco Ventura a enfatisa.
Actualmente tin varios fundacion cu ta duna servicio te na porta di cas, haci compras pa e bestia, hib’e opera, entre otro. Segun señora Franco Ventura, no tin motibo e ora pa no por cuida mascota. Considera bo mascota como bo famia, stim’e, cu ta e motibo pa cua a busca un mascota na prome luga.
