Diego de Cuba, presidente di STA:
- Trahadornan ta haya dos dia liber pega na otro
ORANJESTAD (AAN) Diego de Cuba, presidente di Sindicato Trahadornan Arubiano (STA), a elabora den entrevista cu DIARIO, tocante e CAO di Tierra del Sol.
“Nos tabata ocupa cu nan riba e Contrato Colectivo nobo, y mi tin cu bisa cu nos a caba di yega na otro, practicamente riba tur e puntonan. Aworaki locual nos ta wardando riba dje ta e draft di e CAO nobo pa nos fiha un dia pa nos bay firm e”, De Cuba a indica.
De Cuba a agrega cu practicamente e CAO nobo pa trahadornan di Tierra del Sol ta completamente cla, y nan a conoce un adelanto basta bon toch, y STA ta basta contento cu esey.
E lider sindical menciona cu STA a haci un calculo di cuanto e adelanto ta, y e ta di mas of menos 15% reparti den tres aña, locual no ta malo.
“Tambe nan bonus a aumenta, nan dianan di vacacion, y nan ta bay traha dia so pa siman. Ta dos dia liber y nos ta pidi nan pa e dos dianan liber ey ta pega na otro. Nan ta bay traha 40 ora pa siman. Esaki ta cosnan cu nos a bringa p’e y cu ta husto. Tin hende ta rabia cu nos, pero nos ta contento cu e hendenan di Iberostar a compronde. E argumentonan tabata bastante fuerte, pero nos tabata habri y cu argumentonan concreto”, Diego de Cuba a remarca.
Segun e sindicalista un dia liber pa siman, no ta yuda cu nada. Mayoria di e trahadornan aki tin un famia y practicamente nan bida social ta hopi limita. Anto, eynan nos kier a mira un cambio y danki Dios e Gerencia di Tierra del Sol a wak e parti ey,y aworaki mi ta kere e mayoria di e trahadornan, y principalmente, e miembronan di STA ta contento cu e parti aki”, Diego de Cuba a remarca.
