Diego de Cuba, Presidente di Sindicato STA:
- STA a reuni cu señor James Fazio di aeropuerto
ORANJESTAD (AAN): Señor Diego de Cuba, Presidente di Sindicato STA a declara na DIARIO cu STA a atende un reunion cu señor James Fazio, Hefe Ehecutivo Interino di areopuerto, tocante situacionnan laboral na aeropuerto. Señor de Cuba a remarca cu, mientras nos ta yegando un otro fin di aña, ta importante pa trahadornan tin paz laboral den e compania y no mester bay traha cu miedo sin sa si e dia ta yega unda cu, “nan ta bula nan cabes”.
Segun señor de Cuba, tin persecusion y castigamento innecesario contra trahadornan especialmente den e departamento di siguridad. Esaki, de Cuba a remarca, ta bin for di hefenan.
Aeropuerto Internacional Reina Beatrix ta un compania grandi y vital pa nos pais. Y ta importante pa cumpli cu contracto colectivo manera mester ta. Señor de Cuba a remarca cu lo ta violando por lo menos 13 articulo di e contracto colectivo. STA a presenta pruebanan pa mustra cu e trahadornan tin razon.
“Ora trahadornan ta sinti nan mes incomfortabel, ta na porta di STA nan ta bin bati. Y nan sa cu STA no ta haci wega y si mester bay guera, lo bay guera. Pero, pa nos bay den un accion, nos mester pens’e hopi bon pasobra ta di vital importancia pa nos aeropuerto keda draai optimalmente pasobra e ta entrada economico di nos pais”, señor de Cuba a enfatisa.
Anteriormente, Sindicato STA, bou di peticion di señor Fazio, a manda un carta basta largo p’e di tur loke a pasa y ta pasando. Un copia di e carga aki a bay tambe pa Minister Wendrick Cicilia. Señor de Cuba a enfatisa cu pa awo board tambe tin e carta aki. Por lo tanto, tur ta na haltura di loke ta pasando.
E sindicalista a agrega cu intencion ta pa bolbe haci un peticion na e minister pasobra tin asuntonan y preocupacionnan cu mester atende riba e nivel mas halto. STA ta sinti cu señor Fazio mes lo no por haci mucho pa trece e solucionnan necesario.
Señor de Cuba a expresa cu den un siman lo STA mester reuni atrobe cu señor Fazio. Nan ta pendiente di un fecha ainda. "Señor Fazio ta un homber practico y kier bin cu solucion”, señor de Cuba a bisa.
