Francis Curiel, Inspector na DTI:
*Pa loke ta trata instalacion di gas
ORANJESTAD (AAN) – Den entrevista cu Francis Curiel, Inspector na DTI, el a splica cu nan sa confronta cu e retonan mas grandi, principalmente den Caya Grandi, unda cu mester tene cuenta cu e trucknan di e companianan cu ta deliver gas, tanto pa nan como pa Brandweer den caso di candela, mester haya un caminda facil pa yega e lugar pa cera e yabi di gas.
E reto semper ta e lugar cu a wordo construi pero a lubida cu DTI ta controla e gas. E posicion di e boter di gas ora tin control, hopi biaha ta dificil: mester kibra e muraya pa habri espacio y tene cuenta con pa yene. Otro situacion ta e negoshinan chikito manera esnan den truck, cu mayoria ta di afo y nan ta bin cu nan mesun reglanan cu no ta cuadra cu esnan di Aruba.
Curiel a comenta cu tanto e Hulandesnan como esnan Latino, tin cu trahe conforme Aruba su sistema pa nan por traha manera DTI kier keur.
Nan ta bin Aruba cu un keuring di Merca, Hulanda, of Venezuela pero cu no ta mescos cu di Aruba, y esey, hopi biaha, mester pone nan compronde cu e regla di Aruba ta esun cu ta bay.
E reglanan local ta mara na esnan Hulandes, of di Aruba mes, pero e problema ta cu hopi pais ta uza diferente tipo di material. Hopi biaha ta debi na costo. Actualmente Aruba ta uza tuberia di coper, pero e prijs a aumenta demasiado, y esey ta haci cu hopi hende ta busca un manera mas barata pa traha. Pero material barata no ta e manera safe pa DTI, pasobra e seguridad pa nan ta bay na prome lugar, semper.
Locual cu nan ta confronta regularmente, durante DTI su controlnan , ta cu hendenan ta pone boternan di 20 liber paden di e negoshi, locual ta un peliger. “E ta un peliger unda cu bo pone. Tanto den un restaurant como den un apartamento, etc. Esey ta e aspectonan di mas fastioso cu nos ta haya, y nos kier concientiza nan pa hacie na e manera mas sigur posible, pasobra bo ta expone bo so na peliger pero bo tahadornan tambe”, Francis Curiel a señala.
DTI ta concentra hopi den e area di Palm Beach, entre otro, pa ta safe tanto pa e trahado como pa e publico, cual ta e lema di DTI y tocante esaki nan ta concientizando comercio y comunidad en general, e luna aki.
