Tin mas o menos mil mucha na Aruba cu ta den necesidad

Fundacion Mi Voz ta Bo Voz ta inicia nan campaña di 'Back to School'

ORANJESTAD (AAN):  Lisette Gomez di Fundacion Mi Voz ta Bo Voz ta masha contento cu e donacion cu nan a haya for di 'Kids for Kids' Event' di KLM ya cu nan a haya un bunita donacion di casi 5 mil florin cual nan por uza den nan campaña di 'Back to School'.

            Ya caba tin 3 aña cu oficialmente ta realisa e campaña aki y entrante e siman aki, oficialmente por a cuminsa adopta un mucha.

            Aña pasa a yuda un promedio di 300 mucha. Pero tabata tin mas cu 500 mucha cu ta inscribi y no por a yuda tur mucha.

            Gomez a laga sa cu tin mas o menos mil mucha na Aruba cu ta den necesidad. Pesey ta importante pa tin fundacionnan cu ta haci e tipo di trabaonan aki cu e meta di yuda tur mucha pa nan cuminsa scol.

            Asina cu habri e inscripcion, lo haya sa e cantidad di e aña aki. Tur persona cu ta interesa sea pa yuda of cu mester ayudo por sigui nan Facebook Page: Mi Voz ta Bo Voz unda lo bay pone tur informacion.

            Hunto cu Fundacion pa Nos Comunidad ta screen e muchanan den necesidad y dependiendo di e cantidad lo yuda esnan den mas necesidad prome, a bisa.

            E suma di e aña aki a subi y ya caba a keda un tiki preta pa mantene 150 florin pa mucha. E aña aki a subi pa 175 florin. E mucha lo ta hayando uniform, keds, tas (cu agenda, schriftnan, map), mea.

            Lisette Gomez a splica cu aña pasa nan a wordo acerca door di un hoben, cu ta un Dj y el a bin cu e idea pa corta cabey di e muchanan . A corta cabey gratis di un promedio di 50 mucha homber.

            Pesey e aña aki ta spera di por hay' e cooperacion dui e barberonan atrobe, a declara.