Marceylaine Paskel, PR-DAS:
*Motivando clientenan di bijstand pa subi mercado laboral
ORANJESTAD (AAN)-- Marceylaine Paskel, Relacionista Publico di Departamento di Asunto Social (DAS), den su entrevista cu Matutino DIARIO, a sigui relata cu den e grupo di clientenan cu ta ricibi bijstand, tambe tin mamanan soltero cu ta participando den e trayecto “In The Picture”, cu tin e meta di yuda nan subi e mercado laboral.
“Mi por bisa cu nos a pensa riba nan, mirando cu hopi biaha e mama soltero no tin e parti di créche pa keda cu nan yiu. Dus, nos a facilita esaki conhuntamente cu Ja IK Aruba, mirando e posibilidad cu nan por crea tempo pa por bin na e trayectonan, pasobra nan mester a bin tur diamars y diahuebs. E ta costa tempo, y e ora ey no por a duna un lugar sigur”, señora Paskel a indica.
El a sigui bisa cu e trayecto aki ta hopi bon; nos a mira caba clientenan cu a drenta den e mercado laboral, den e transcurso di tempo aki, y aworaki nan lo cuminza cu stage, unda cu lo cuminza bek cu structura, e manera con nan lo cuminza traha, etica laboral, y tur esaki cu nos ta custumbra y yega drenta bek”, Marceylaine Paskel a señala.
El a añadi cu DAS ta keda den contacto cu nan, y como sosten y guia social tin trahadornan social cu ta keda pendiente di nan clientenan, pero tambe como parti di investigacion semper ta keda den bon comunicacion cu nan.
“Mi ta invita tur persona cu ta sinti cu ta tempo pa un cambio, cu nan kier transforma nan bida, semper por acudi na nos localidadnan pa guia social, of si nan tin sosten financiero y nan kier bin nan ta bon bini. Nos ta kere semper den empodera nos clientenan, empodera e comunidad y semper nos ta man habri pa sostene esaki”, Marceylaine Paskel, PR di DAS a reitera.
