Señora Swinda Dumfries di DVG:
Obesidad ta bira un di e desafionan di salud publico mas grandi na mundo y tambe na Aruba. Cada aña, e cantidad di muchanan y adulto cu ta enfrenta problemanan di sobrepeso y obesidad ta aumenta, treciendo consecuencianan serio manera diabetes, presion halto, problemanan di curason y dificultadnan emocional y social. Specialistanan ta alerta cu obesidad no solamente ta afecta e curpa, pero tambe e bienestar mental y emocional di un persona.
Pa combati e problema aki, e proyecto “Scol Saludabel” ta enfoca riba promove habitonan saludabel, alimentacion balancea y actividad fisico na scolnan di Aruba. E meta principal ta pa yuda muchanan y mayornan bira mas consciente di e importancia di un bida saludabel y crea habito positivo cu por dura pa bida.
Señora Swinda Dumfries di DVG a splica den un entrevista cu DIARIO cu obesidad no por wordo separa di e aspecto social y emocional. Segun e, “Scol Saludabel” ta pone enfasis riba alimentacion saludabel y movecion, pero tambe riba e desaroyo integral di e mucha. El a remarca cu alimentacion saludabel mester cuminsa na cas, aunque ta un aspecto cu DVG ta sigui duna atencion special den e programa.
Durante e Siman Saludabel di siman pasa, cu a wordo considera un exito, mayornan tambe a wordo activamente envolvi. Esaki a mustra cu scolnan, mayornan y comunidad hunto por contribui significamente na salud y bienestar di muchanan. Cu apoyo y participacion di mayornan, muchanan ta haya mihor guia pa crece cu disciplina, conocemento y conciencia tocante nan salud.
E base mas fuerte di cada mucha ta su salud y bienestar. Ora muchanan for di jong siña come saludabel, haci movecion, sa con pa trata otro y maneha emocionnan na forma positivo, nan tin mas oportunidad pa crece mas fuerte, mas feliz y cu mas siguridad den nan mes.
Obesidad no mester bira parti normal den bida di nos muchanan. Hunto como mayornan, scolnan y comunidad, nos tin e responsabilidad pa guia y proteha nan cu habitonan saludabel, movimiento y bon alimentacion, pa nan por crece fuerte, feliz y cu un futuro mas saludabel.
Señora Dumfries a enfatisa cu esaki ta un responsabilidad principalmente di mayornan, cu ayudo y sosten di scolnan, instancianan concerni cu mucha y tambe Gobierno di Aruba. “E meta principal ta pa aporta na crecemento di nos muchanan den un ‘One Happy Island’ di berdad,” el a expresa.
