Tin hende na Aruba cu ta kere cu Omicron ta djis un griep

Omicron ta un variante di Covid-19

ORANJESTAD (AAN):  Ainda tin hopi hende na Aruba cu ta refiriendo na Omicron como un malesa independiente di Covid-19 y e personanan aki ta creando hopi confusion na Aruba riba e rednan social.

 Por ehempel, por a mira un persona reacciona riba un di e paginanan basta conoci di Vraag en Aanbod unda e ta bisa cu e virus aki ta Omicron y no Covid. Locual e señora aki no tin kisas claridad riba dje ta cu Omicron ta un variante di Covid-19.

E hecho cu ta un variante no kiermen cu ta algo los di Covid-19. Omicron ta un variante di e virus conoci como Covid-19.

Recientemente a conoce un variante di Covid-19 cu e nomber Delta. E variante aki ta esun cu a causa hopi hende malo na Aruba y ademas di esey hopi fayecimento.

Delta ta un variante cu a causa basta hospitalisacion pa motivo cu e tabata afecta e pulmon.

Den e caso di Omicron ta un variante mas contagioso, pero alavez cataloga como mas leve pa motibo cu e ta aloca den nanishi y den garganta. no den pulmon.

Esaki ta algo cu tambe ainda hopi hende no ta compronde na Aruba. Nan no ta compronde e diferencia riba pakico Omicron ta mas contagioso.

Si ta mira e ubicacion di e nanishi y di e garganta mas cu claro por ripara cu e organonan aki ta situa mas ariba den e aparato respiratorio di un persona. Ta pa e motibo ey cu e variante Omicron ta mas contagioso ya cu ta mas facil pa e plama for di un persona pa otro.

Ta berdad cu omicron por presenta como un simpel griep, pero locual mester tene cuenta cu esaki ta causa pa e variante aki, cu ta un mutacion di e virus original SARS-CoV-2.

E virusnan ta cambia constantemente atravez di mutacionnan y e mutacionnan aki ta trece cu nan un variante nobo di e virus. Algun variante ta aparece y despues ta disparce, mientras cu otro variantenan ta persisti.

Lo sigui aparece variantenan nobo, segun CDC, y nan lo sigui monitorea tur e variantenan di e virus cu Covid-19 ta causa.

E vacunanan ta reduci e riesgo di bira malo gravemente, di wordo hospitalisa y muri a causa di COVID-19.

Te cu awor a conoce e variantenan di Alpha, Beta, Gamma, Delta y Omicron. Tur ta variante deriva di e virus di Covid-19 (SARS-CoV-2).