Director di KvK Martijn Balkestein:
- KvK no por duna boet, pero DIMP si
ORANJESTAD (AAN) Tin indicacion cu tin mas hende ta haciendo negoshi online na Aruba, pero no ta registra na Camara di Comercio y Industria, y no ta paga impuesto, esaki entre algun otro empresa.
Director di Camara di Comercio y Industria, señor Martijn Balkestein, riba e pregunta di DIARIO, con di con esaki ta sosode, el a comenta cu supuestamente tur hende conoce e leynan di Aruba, pero den practica nan no ta cumpli, of tin hende cu no sa e leynan mes.
P’esey mes, KvK tin den su website kico precies un hende mester haci na momento cu e ta economicamente activo, ademas cu eyfo nan ta duna training y ta purba ta mas informativo posible.
Pero tambe tin hende cu na proposito no ta registra pasobra nan no kier paga e fee cu mester paga, aunke e ta hopi abao, y tampoco ta paga impuesto.
Balkestein a señala cu na inicio mester ta impuesto pasobra DIMP tin mas poder cu KvK, nan por pone boet locual KvK no por haci.
Na momento cu KvK ta constata cierto cosnan, nan mes no por inscribi hende ni haci mucho cos, y nan ta depende di loke e comerciante ta haci.
Ora un compania ta inactivo pa hopi tempo no tin efecto, pero e mester informa KvK pasobra na dado momento e por yega na un status di keda drumi, mientras belasting si por dal nan cu impuesto.
Diripiente e comerciante ta bin na KvK paga loke mester paga y cu no a haci pa varios aña. E por compronde cu ningun hende ta gusta paga impuesto, ni e suma na Camara di Comercio, pero KvK su funcion ta pa asegura cu por check cu ken bo ta bay deal. Si e persona bay na KvK e ta haya e datonan por nada. Impuesto tampoco ta worde cobra por nada, sino pa paga e servicionan colectivo manera mantene e careteranan, educacion y hopi mas.
